Shillong, Rymphang 13
Ka tnat pulit ka khmih lynti ba na ka bynta ki 3,000 tylli ki kam pulit ki ban sa lait ha une u snem mang tyngka la khmih lynti ba ki nongthep kam kin ym duna ïa ka 3 lak ngut, bad na ka liang ka tnat kan thung da ki kynhun kiba nabar ba kin pynïaid ïa ka jingpynrung kam ïa kaba la thmu ban pynlong da ka jingkhuid (Transparent Recruitment Process).
Kine ki kam ki ban long ki dei na ka bynta ka kyrdan Sub-Inspector, Constable bad kiwei-kiwei. Hynrei ki lah ban don ki jingkylla ha ki kam kiba lait bad ha ka jingdon ki nongthep kam.
Kane ka jingtip ka dei kaba la lum na ka byrta ba la pynmih da ka shlem treikam jong u IGP (R/PR) uba long ruh u Chairman ka Central Recruitment Board, Meghalaya. Ka jingpynmih ïa ka byrta ka long ban khot ïa ki kynhun ban ïashim bynta ha ka jingjied ïa ka kynhun ka ban pynïaid ïa ka jingpynrung kam pulit.
Ha kane ka jingpynrung kam, la ithuh shai ba ka tnat pulit ka kwah ban pyndonkam da ki kor ki bor kiba bun rukom khnang ba ka jingpynrung kam kan long ka bakhuid bad kaba lait na ki jingbakla.
Ka kynhun ban shah jied ban pynïaid ïa ka jingpynrung kam kan hap ban pynbiang ïa ka “Recruitment Application Software” bad kan hap ban bud pyrkhing ïa ki kyndon khnang ba kan don ka jingkhuid bad jingshai ha ka rukom pynrung kam.
Nalorkata, ka kynhun kan hap ban saiñdur ïa ka jingthep ïa ki kot ki sla lyngba ki rynsan ‘online’, ban peit bniah ïa ki kot ki sla bad ban buh ïa ki kyrteng jong ki nongthep kam. Kan hap ruh ban pynbiang ïa ki ‘Admit Card’ na ka bynta ka PET bad Written Examination/Trade Test.
Shuh shuh ïa ka jingpynrung ïa ki nongthep kam bad ka jingpynthikna ba kan ym don ka jingbakla, hap ban leh da ka “Biometric Identification Authentication & Registration”.
Hap ban pyndonkam ruh da ki kor ki bor ban thew ïa ka rynïeng jong ki nongthep kam. Ban thew ïa ka por ba ki nongthep kam ki pyndep ïa ka jingmareh, hap ban pyndonkam da ka kor Radio Frequency Identification (RFID) Technology. Ka jingmareh kan long na ka bynta 5 km na ka bynta ki shynrang bad kin hap ban pyndep hapoh 24 minit, bad 3 km na ka bynta ki kynthei bad kin hap ban pyndep hapoh 19 minit.
Yn hap ban buh ruh da ki kor CCTV ha ki san tylli ki jaka ban pynlong ïa ka jingpynrung kam.
Nalor kitei kiba la kdew haneng, ki don sa kiwei pat ki jingpyntreikam da ki kor ki bor ha ka por ba don ka jingmareh, jingthoh eksamin, bad ka ‘Personal Interview’.
