Shillong, Rymphang 13
Ka kam jngoh kai pyrthei ka long ka lad kaba lah ban ai kam ai jam bad kyntiew ïa ka jylla bad ri ha ka liang ka ïoh ka kot, ka imlang sahlang bad ka riti dustur. Lada ngi shim khia shisha ïa kane ka kam kan bteng ban ïarap pateng la pateng ïa u khunbynriew.
Ka Shnongpdeng kaba hap ha Amlarem Civil Sub Division, West Jaiñtia Hills District kaba don hajan Dawki ka la long shisha ka kabu kaba ai kam ai jam ïa ki briew namar kumba palat 75 percent ki nongshong shnong ki im ja na kaba buh dukan, khrong tiket, bai ïeng kali, ki jaka sah, kiba kinglieng bad kiwei de.
Ka jingsdang ban kyntiew ïa ka kam jngohkai pyrthei ha Shnongpdeng ka la sdang naduh u snem 2009 da kaba pynkhuid ïa ka shnong. Dei ha u snem 2015 ba ki nongjngohkai pyrthei ki la sdang ban wankai namar ka jingdon ka wah Umngot kaba wan na ki thaiñ Smit ban poi sha Dawki.
Ka Shnongpdeng ka don kumba 140 tylli ki tnum ïing ha ka jingdon briew palat 1,000 ngut kaba dei ka shnong kaba bun na ki briew ki im da ka rep. Pynban naduh ba kiew ka kam jngohkai pyrthei, ki don ki briew ki bym treh rep shuh namar ba ki la trei ha kane ka kam namar ka kam kamai jakpoh bad kaba pynsuk.
Ka jingsngewtynnad ki nongjngohkai pyrthei ban leit sha Shnongpdeng ban ïaid na Darrang ka dei namar ki don bun jait ki jingïalehkai kaba ki lah ban pynlut por baroh shisngi kum kaba shong lieng, king-lieng, ban jngi bad kiwei.
Kaba kham khring shuh shuh ïa ki briew ha kane ka jaka ka dei namar ka jingdon ka jingkieng kaba heh ban pynïasoh na Shnongpdeng sha ki thain Pynursla kaba hap ha East Khasi Hills namar sha shiliang ki don ki riewshimet ki buh ïa ka jaka sah kaba pyngngad.
Ka Shnongpdeng ka la plielad ruh ïa ki nongshong shnong da kaba ailad ba kin shna ïa ki ïing-dara kiba don palat 300 tylli kaba la pynïeng harud jong ka wah hynrei ha ka por lyiur ki trai ki la rah noh sha ïing namar kim shngaiñ ïoh ka rah ka um.
Haba ïakren bad u Bah B. Synrem uba dei u Rangbah shnong ka Shnongpdeng, u la ïathuh ba ka jingsdang ban paw ha ki kam jngohkai pyrthei ka dei nyngkong ba ki pynkhuid ïa ka shnong bad dei hangne ki paidbah ki sngewtynnad ban wan kai namar ka jingdon ka wah Umngot kaba tuid sha Dawki.
U la ïathuh ba ki briew kiba ju wankai bha dei ha ka por tlang naduh bnai Naiwieng haduh bnai Lber katba kiwei pat ki jaidbynriew na kiwei ki jylla ki kham wan ha ki bnai lyiur, shuti puja.
“Ngi sngewkmen ban a ka jingdon kane ka jaka jngohkai pyrthei ka la aikam ïa ki nongshnong shnong kumba 75 percent” u la ong.
U la pyntip ba ïa ka jingkieng la shna ha u snem 2012 hynrei namar ba ka khyllem noh la shna biang ha u snem 2015 bad la lah ban ïaid lyngba sha shiliang ban leit rep.
Kumta u la kyntu ïa ka sorkar jylla ba kan phaikhmat lem sha ka Shnongpdeng ba kan lah ban pynitynnad shuh shuh ïa kane ka jaka jngohkai pyrthei.
Wat la ka Shnongpdeng ka la khring ïa ki nongjngohkai pyrthei hynrei ka surok na Darrang shaduh Shnongpdeng ka dangrit namar kan jynjar lada wan ki bos lada ïakynduh ha shiteng lynti.
Nangta kaba pynthait ïa kiba wankai sha Shnongpdeng lada dei kiba wan Shillong namar ka jingsniew ka surok na Pynursla sha Dawki hynrei lada ïaid na Jowai wat lada ka bha ka surok hynrei ka jngai palat.
