Shillong, Rymphang 13
Ka ilekshon MP bad MDC ka la jan bad ka jingwan pynïasoh ki dkhot bad ki nongkitkam na ki seng saiñ pyrthei bapher bapher sha ka Voice of the People Party (VPP) ruh ka dang ïaid shakhmat ban ai ka jingkyrshan bad pynkhlaiñ bor shuh-shuh ïa kane ka seng.
Kitei ki nongïalam bad ki dkhot jong ki seng saiñ pyrthei bapher bapher ki don palat 50 ngut. Kine ki kynthup na ka Congress, United Democratic Party (UDP), Hill State People’s Democratic Party (HSPDP) bad baroh ki dei napoh ka Nongstoiñ Constituency hapoh ka jingïalam jong u Bah Golden Nonglong uba dei u Secretary barim ka Congress na Nongstoiñ.
Ïa kitei ki nongïalam bad ki dkhot la pdiang sngewbha da u President rangbah ka seng, u Bah Ardent Miller Basaïawmoit ha ryngkat ka jingdon ryngkat lang u MLA ka seng na North Shillong, u Bah Adelbert Nongrum, u MLA ka Mawlai, u Bah Brightstarwell Marbaniang, u MLA ka Mawryngkneng, u Bah Heaving Stone Kharpran nalor kiwei-kiwei ki nongkitkam ka seng.
La ïoh ïa ka jingkren na u President ka seng, u Bah Ardent Miller Basaïawmoit, u Vice President ka seng, u Dr. Kara Chen kum u nongkren pdiang sngewbha, ka jingkren lyngkot na u Bah Adelbert Nongrum, u Bah Brightstarwell Marbaniang bad kiwei kiwei ki nongïalam jong ka seng.
Haba ai jingkren ha katei ka sngi, u Bah Ardent Miller Basaïawmoit, u la ong ba ka jingwan pynïasoh jong kitei ki nongïalam bad ki dkhot jong ki sengsaiñ pyrthei sha ka VPP ka dei ka jingsngewkhia na ka bynta ka ri bad ka Jaitbynriew ka ban sa long bad wan kaba la pynlong ïa ki ba kin ym sngewsuk ka mynsiem ba kin shong bad don ha ki seng saiñ pyrthei kaba ki don.
“Haba phi rung sha ka VPP, phi dei ban rung da ka jingshaniah ïa ki nongïalam jong ka seng bad kumjuh ruh ba phi pdiang ïa kata ka nongrim kaba beit”, la ong u Bah Ardent.
U Bah Ardent u la kyntu ba kino-kino kiba wan pynïasoh sha ka seng kim dei ban wan da ka jingthmu ban pan tiket ban ïakhun ïa ka ilekshon hynrei ki dei ban wan rung halor ka nongrim bad ban ieh ha ka jingstad jong ka seng ba kan sei hi ïa kino-kino ki kyrtong.
U la ong ba ki dkhot kiba thmu ban wan pan tiket na ka VPP kim dei ban duh jingkyrmen lada kim ïoh ïa ka tiket hynrei ki dei ban buh ka jingshaniah ha ki nongïalam ka seng kumba shaniah ki paidbah.
Shuh shuh u Bah Ardent u la ong ba ki don ki seng saiñ pyrthei kiba la leit sha ki paidbah ban ïalap ilekshon, ka jingkren jong ki ka la long kaba shyrkhei bad kaba sngew tad dor ha kaba ki ju ong ba lada ki jop ïa ka ilekshon kin pynshong ïa kiwei pat ki seng halor bos bad kane ka jingïalap ka la pynhiar dor ïa ka jingkren.
U la ong ba kum ka seng VPP hi kam ïalap ilekshon da kaba kren kumne kumtei kumba kren lem kiwei ki seng hynrei ka seng kan ïalap ïa ka ilekshon halor ka nongrim.
Na ka liang u Bah Brightstarwell Marbaniang u la ong ba kum ka seng kam kwah ba ki paidbah kin shu bud matlah ïa ka seng, hynrei kum ka seng ka kwah ba kin bud da ka jingtip briew tip blei bad ka nongrim jong ka seng.
