New Delhi, Rymphang 13
Ka jingpyrshang jong ki phew hajar ngut ki nongrep ban tur sha ka nongbah Delhi ha ka Sngi Ba-Ar, kaba dei ruh ka sngi banyngkong jong ka jingïakhih ka jong ki pyrshah ïa ka Sorkar Pdeng, ka la long kaba shyrkhei.
Ki pulit ka Haryana ki la shim lut ïa ki sienjam baroh ban khang ïa ki nongrep ban rung sha Delhi. Ki pulit ki la kawang da ki lyer pynsat khmat ba kit ha ki ‘Drone’, jingker ïa ki surok da ki kynroh ba la shna kyrpang, jingsynreit da ka um, jingpyllait lyer ïa ki shaka kali bad ka jingbuh ïa ki byrni ba la thep da u shyiap. Ha kane ka sngi, ki la don ruh ki nongrep kiba la shah bat ha ki pulit ha khappud Ambala-Shambu.
Kine ki nongrep ki la phut bad weng ïa kiba bun ki jingker ba la pynap da ki pulit bad ki la ong ba ki la pynkhreh na ka bynta ka jingïakhih kaba jrong bad ki la wanrah ruh ïa ka bam ka dih bad ka umphniang ‘Diesel’ ka ban neh hynriew bnai bad kumjuh ruh ïa ka umphniang.
“Mynshwa, ngi khlem khih satia na ka jingïakhih wat hadien 13 bnai. Ka sorkar ka la kular ba kan pynurlong ïa ki jingdawa jong ngi, hynrei haduh mynta kam pat leh eiei. Ha kane ka kynti, ngin sa pynkut ïa ka jingïakhih tad haduh ba ka sorkar kan pynurlong ïa ki jingdawa,” la ong ki nongrep.
Mynta ka sngi, ki nongrep ki la sdang ïa ka jingïakhih ïa kaba la ai kyrteng ‘Delhi Chalo’ lane ka jingtur sha Delhi kaba dei ka nongbah jong ka Ri. Kane ka jingsdang ka long hadien ba ka jingïakren bad ki Myntri ka Sorkar Pdeng ha ka miet Lah Sngi U Blei ka khlem pat lah ban pynhun ïa ki nongrep.
Napdeng ki jingdawa jong ki nongrep ka dei ka jingwanrah da ka aiñ ka ban pynthikna ba kan don ka ‘Minimum Support Price’ (MSP) ïa baroh ki mar rep, jingmap noh ïa ki ram ki shah ba la shim da ki nongrep, bad ka jingpyntreikam ïa ki jingai jingmut ka Commission ba la khlieh da u Dr MS Swaminathan.
Kine ki lai tylli ki mat jingdawa jong ki nongrep ki la paw ha ki jingïakren bad ki Myntri Sorkar Pdeng hynnin ka sngi. Ki nongrep ki la kynnoh ba ka Sorkar Pdeng ka la shu pynlut kai ïa ka por ba kam don jingthmu ban pynurlong ïa ki jingdawa jong ki.
Ha nongbah Delhi, ki pulit ki la pynjari ïa kiba bun ki jingpyrkhing ban khanglad ïa ka jingïalum paidbah ha khappud, jingpynïeng ïa ki jingker ha surok bad jingpynap da ki prek ha surok.
Hynne ka sngi, ka sorkar Delhi ba la ïalam da ka AAP ka khlem ai jingmynjur satia ïa ka jingkyrpad na ka Sorkar pdeng ban pynlong ïa kawei ka ‘stadium’ kum ka jaka ban set shipor ïa ki nongrep.
Ha kawei pat ka liang, u President ka seng Congress, u Mallikarjun Kharge, mynta ka sngi u la ong ba lada ka seng ka wanphai sha ka bor synshar, kan pyntreikam ïa ka aiñ na ka bynta ka MSP.
Na ka liang u Kharge u la takraiñ ruh ïa u Myntri Rangbahduh, u Narendra Modi, da kaba ong ba ki paidbah kim dei ban ngeit satia ïa ki jingkular ki jong u Modi.
Shuh shuh na ka liang ka Samyukt Kisan Morcha, kaba dei ki kynhun jong ki nongrep, ka la thoh sha u Modi ha kaba ka la pynrem jur ïa ka jingleh jong ka sorkar pyrshah ïa ki nongrep kiba la ïashim bynta ha ka jingïakhih ban tur sha Delhi.
