Nongpoh, Rymphang 13
Ka Young Minds Association (YMA), kawei na ki seng kaba ju trei na ka bynta ban kyntiew ïa ka imlang ka sahlang, ha ka Sngi Ba-ar ka la ïoh ban pynsahnam ïa u Dr DD Lapang uba dei uwei na ki nongïalam saiñ hima- sima ba radbah jong ka thaiñ Ri Bhoi bad uba la long la bunsien kum u Myntri Rangbah ka jylla ha ki snem kiba la leit noh, da kaba plie paidbah ïa u motdur ba shirynïeng ha phyllaw jong ka Ri Bhoi College.
Ïa une u motdur jong u Dr DD Lapang la wan ban plie paidbah da u Symbud Myntri Rangbah ka jylla, u Bah Prestone Tynsong ha ka jingïadon ryngkat u Dr DD Lapang ba la wan ban synran ryngkat da ki bahaïing bahasem, ka Myntri ka koit ka khiah, Dr Ampareen Lyngdoh, u MLA ka Nongpoh Bah Mayralborn Syiem, u MLA ka Mawhati Bah Charles Marngar, u President ka YMA, u Bah Isynei Hinge lem bad kiwei kiwei.
Haba ai jingkren ha kane ka sngi, u Dr DD Lapang u la pynpaw ïa ka jingsngewnguh sha ki nongïalam ka YMA kiba la ibit ban pynsahnam ïa u lyngba u motdur ba shirynïeng uba pynïeng ha phyllaw jong ka Ri Bhoi College kum shibynta ban pynsah jingkynmaw halor ki matti kiba u la shakri na ka bynta ban kyntiew ïa ka thaiñ Ri Bhoi bad ka jylla hi baroh kawei.
Wat hapdeng ka jingnoh jong ka rta, u Dr DD Lapang u la ong ruh ba ka mynsiem ban shakri ïa ki paidbah ka dang ïai im bad ïai rhem ha u katba u dang im ha kane ka sla pyrthei. U la kyntu ruh ïa ki nongïalam ka YMA ba kin long kiba ïa tylli, ban nang trei shitom na ka bynta ban kyntiew ïa ka imlang ka sahlang jong ka thaiñ hi baroh kawei.
U Symbud Myntri Rangbah ka jylla, u Bah Prestone Tynsong haba ai jingkren kum u kongsan, u la ai ïa ka jingïaroh sha u Dr. DD Lapang da kaba ong ba um dei shuh tang u nongïalam ha Ri Bhoi lane ha ka jylla Meghalaya, hynrei u Dr DD Lapang u la dei uwei na ki nongïalam uba la ïoh nam bad ithuh ha baroh kawei ka ri.
Kiwei kiwei ki nongkren ba kynthup naduh ka Dr Ampareen Lyngdoh, u Bah Mayralborn Syiem, u Bah Charles Marngar ki la pynpaw ruh ïa kajuh ka sur ai jingïaroh sha u Dr DD Lapang, ba u dei u nongïalam uba dei hok ban ïoh ïa kane ka burom, ym tang na ka seng YMA hynrei na ki nongshong shnong jong baroh hi ka jylla halor u synñiang u bynhei uba une u rangbah u la shakri ban kyntiew ïa ka jylla hi baroh kawei.
