Shillong, Rymphang 13
Ka kynhun ki samla pule jong ka St. Anthony’s College, Shillong ha ka Sngi Ba-ar ka la mih shakhmat ban pynpaw ka jingpyrshah halor ka jingthmu ka kolej ban phah phong ‘uniform’ ïa ki samla pule bad kyntu ruh ïa ki bor ba dei khmih ban pyllait pura ïa kiba pule ha ka ‘4th Semester’ na katei ka rai kaba ka kolej ka la shim.
“Ngi la ïakynduh ïa u Principal bad ai ïa ka jingthoh kaba ngi la ïasoi ryngkat ki jingwad jingtip halor ka ïoh ka kot jong ki samla pule, nalor ka shithi ka ban kyrpad pyllait pura ïa ki samla pule ka ‘4th Semester’,” la ong u samla Arman Malngiang, uwei na ki samla pule ka kolej haba kren sha ki lad pathai khubor hadien ka jingïakynduh bad u Principal ka kolej, Dr. Br. Albert L. Dkhar.
U la ong ruh ba ka kynhun ka la kyrpad ïa u Principal ba ïa ki samla pule ‘1st Semester’, ki bor pynïaid kin kham jem namar ha ka por ba pynïasoh sha ki kolej kim shym la ïoh jingtip ba kin hap phong ‘uniform’.
“Kaei kaba ngi kyrpad ka long ba ïa ngi jong ka ‘4th Semester’ ban pyllait pura noh na kane namar ngi don sa tang shi snem ha kolej. Ka long leh nohei ban thied ïa ki ‘uniform’ na bynta T.5800 da kaba buh jingmut ba ngi don sa tang shi snem,” u la ong.
U la ong ruh ba ka kynhun ka la ai jingmut ïa u Principal ban pyntreikam ïa ka jingphong ‘uniform’ naduh u snem ban wan ha ryngkat ka jingpyrkhing naduh ïa kito kiba dang wan pynïasoh thymmai sha ka kolej tangba ka kolej kan hap buh jingthoh, hashuwa ba ki samla kin pyndap ïa ka phom – ba kiba rung ha ka kolej, ka ‘uniform’ ka long kaba donkam.
“U Principal u la ong ba ïa kaba mynta, kane kam dei ka rai jong u marwei, hynrei na ki bor ba halor (Salesian) bad un hap ban shong jingïalang shuwa bad ki ban ïakren halor ka jingeh ki samla pule kumjuh halor kaei kaba la jia mynta ka sngi,” u la ong.
Namarba ka kolej kan sa sdang noh ha une u taïew ban wan, katei ka kynhun ka la kyrpad ïa u Principal ba un ym pynshitom ïa kito ki bym treh phong ‘uniform’ wat la na ka liang jong u (Principal) u la pynsngew ba un hap ïakren shuwa bad ki bor ba halor.
“Na ka liang jong ngi ki samla pule ngi la rai ban ym phong ïa ka ‘uniform’ kat bym pat dep kata ka jingïalang u Principal bad ki bor ba halor…ngin peit kaei kaba mih na kane,” la ong u samla Malngiang.
Ha kawei pat ka liang, sa uwei na ki samla pule u la ong ba ha ka jingïakynduh bad u Vice-Principal (VP) halor katei ka bynta ha u Nohprah jong u snem ba la dep, u VP la ïathuh sha ki ba ka don ka ‘Governing Body’ kaba la rai ban pyntreikam ïa ka ‘uniform’.
“Haba ngi la pyrshang kylli biang…u la ong ngam tip bad u pyrshang kiar ban jubab ïa ka jingkylli,” u la ong da kaba bynrap ba ki don kumba 400 ngut eiei ki samla pule ka ‘4th Semester’ kiba pyrshah ban phong ‘uniform’.
Shuh shuh haba kdew ba ka kolej ka don ïa ka rukom riam kaba hap ban bud – ka riam don akor, utei u samla u la buh jingkylli ba lada don ba pynkheiñ ïa kata ka rukom riam, kaei ka jingpynshitom kaba u Principal u la leh ïa kita kiba pynkheiñ, naba haduh mynta ym pat ïohi ban pynshitom ïa kiba pynkheiñ ïa katei ka rukom riam kaba hap ban bud.
U la bynrap ba kiba bun na ki samla pule ‘5th Semester’ ki la mynjur naba katei ka rai jong ka kolej kan ym ktah ïa ki namar kin sa mih noh na ka kolej.
