Shillong, Rymphang 13
U kyrtong ka Congress ha ka ilekshon Lok Sabha na Tura konstitwensi, u Saleng A Sangma u la ong ba wat lada ka Congress ka shah kynthoh ba ka dei kaba tlot, hynrei ym dei ka NPP ne Congress ne TMC ki ban ai ‘vote’ ïa u, hynrei ki paidbah ka Rilum Garo kin sa ai ‘vote’ ïa u ha kane ka ilekshon ka ban sa wan.
“Ngan mihkhmat kum u kyrtong ka Congress na Tura, hynrei ym dei ka NPP ne Congress ne TMC ne kiwei pat ki ban ai ‘vote’ ïa nga, hynrei dei ki paidbah ka Rilum Garo baroh kawei ki ban sa ai ka ‘vote’ bad ai ïa ka rai jong ki,” la pynpaw u Saleng haba pynpaw ka jingsngew skhem ba ka Congress kan sa jop ha kane ka ilekshon Lok Sabha ka ban wan.
U la ong ruh ba ka Congress ka dei ka seng kaba u ïeng kum u kyrtong, hynrei ma u dei ban mihkhmat na ka bynta ki paidbah ka Rilum Garo baroh kawei kum u MP ha Parliament.
Haba kylli shaphang ka jingsngew ki paidbah ka Rilum Garo la ki shim ba dei tang ka Congress kaba lah ban ïakhun pyrshah ïa ka BJP ha ka ri baroh kawei, u Saleng u la ong ba ki paidbah ki sngewthuh bad tip bha ïa kaei kaba jia ha ka ri hapoh ka jingïalam ka BJP lem bad kito ki seng kiba kyrshan lang ïa ka BJP.
U la ong ba kaei kaba jia ka long kaba pynsyier ïa ki paidbah namar ka UCC ka don hakhmat, bad ki paidbah ki la ïohi kumno wat ki Ïingmane ruh ki shah leh dusmon.
U la ong ruh ba um kwah ban kynthoh ne beiñ ïano ïano namarba u tip ba ki paidbah kim dei tang jong kano kano ka seng, hynrei ki dei jong ka Rilum Garo baroh kawei.
Kumta u la ong ba kam pher wat la ka Congress ka don tang uwei u MLA na Rilum Garo hynrei ki paidbah ki don ban kyrshan ïa u kum u kyrtong ka seng.
