Shillong, Rymphang 13
U Symbud Myntri Rangbah, Bah Prestone, u la ïai ban biang bad kyntu ïa ka HNLC bad ki nongïalam jong ka ban bteng ïa ka jingïakren, bad u la pynshai ba u khlem ïoh satia ka jingthoh na ka HNLC bad ka dei kaba la shu leh drama ha social media.
Haba kylli la ma u kum u Symbud Myntri Rangbah uba peit ïa ka tnat pulit ka Jylla, u la ïoh shisha ïa ka shithi kumba la kam da u nongïalam ka HNLC u Saiñkupar Nongtraw, u Bah Tynsong u la ong ban jubab ïa kaei kaba thoh sha social media kam don jingmut namar ka dei kaba shu leh drama, hynrei kawei kaba ka Sorkar ka ïeng ka long ba ka dang khot ïa ka HNLC ban wan sha ka jingïakren.
U la ong ba ki nongïalam ka HNLC lehse ki sngew ba lada ki wan ban ïakren ki lah ban shahkem hynrei kam long kumta namarba ïa ki la pyllait lynti ba kin wan bad ka jingïakren kan urlong.
Hynrei u Bah Tynsong u la ong ba lada ki nongïalam ka HNLC kiba hakhmat ki sngew ba donkam ban ïakren ha kawei pat ka jaka kaba ki sngew ba ka long laitluid, ïa kata ruh ka Sorkar ka kloi ban ïakren.
Kumta u Bah Tynsong u la ong ba ka jingkhang ban ïakren ka dang plie bad ym dei “u Prestone u khot ïakren,” hynrei dei ka Sorkar Pdeng bad Sorkar Jylla ba khot ïakren ïa ka HNLC bad ka jingïakren ruh ka hap ïaid ryngkat ka jingbthah ka MHA.
“Ngam lah ma nga ban khot ïakren lada ka MHA kam ai jingbit,” u la ong, kum ka jingpynkynmaw ba ka HNLC ka dei ka seng kaba la shah ñiew beaiñ ha ka Sorkar Pdeng.
Ka HNLC dang shen ka la weng noh na ka jingïakren ha kaba kawei na ki daw ka long ba ka Sorkar kam treh ban map noh ïa ki kam bymman kiba la leh ha ki por ba la leit.
