Shillong, Rymphang 14
Ka jingdon jong ki briew kiba khlad na ki jingjia aksiden kali ha sor Shillong ha u snem ba la dep ka long 40 ngut katba 6 ngut kiwei pat ki la duh noh la ka jingim ha u bnai Kyllalyngkot mynta u snem.
“Tang ha sor Shillong, ha u snem ba la dep, ngi la pynngat mukotduma ïa 46 tylli ki jingjia aksiden kali, bad na kine, 40 ngut ki briew ki la khlad noh katba 15 ngut ki la mynsaw jur,” la ong u Superintendent of Police (Traffic), East Khasi Hills, u K. Prasad haba ai jingkren ha ka jingïalang ‘National Road Safety Month’ ba la pynïaid da ka tnad Transport ka Sorkar Jylla ha ka Sngi Balang.
U la ïathuh ruh ba ha u bnai Kyllalyngkot mynta u snem, la pynngat mukotduma ïa 6 tylli ki jingjia aksiden kali bad ha kine ki jingjia, 6 ngut ki la duh ei la ka jingim bad 13 ngut kiwei pat ki la mynsaw jur.
U SP u la ong ruh ba ka daw jong kine ki jingjia aksiden ka dei namar ka jingñiah kali thurmur, ka jingpynher sted bad kumba la pynsngew da kiba bun ki nongkren ha ka jingïalang – ka jingbym burom shuh ïa ka hok jong iwei-iwei.
“Ngim pyrkhat haba ngi pyndonkam ïa ka surok, ngi shu kyrkieh beit, ngim pyrkhat ïa kiwei bad ngi ïaknieh para kali ha ki jaka ïew ba bun briew. Ki pulit pynïaid kali ha surok, ki pyndep hok la ka kamram bad pyntreikam ïa ki kyndon aiñ,” u la ong.
Ha kajuh ka por, u la ïathuh ba dei tang ki nongñiah kali kiba lah ban wanrah jingkylla naba ha ki shong ka jingkitkhlieh ym tang ïalade hynrei ïa kiwei ruh kiba shong lang hapoh kali.
Haba kyrpad ïa ki nongñiah ban kiar na kaba ñiah kali ynda la dih la bam, u Prasad u la ong ba ka jingñiah kali ynda la dih la bam ka long kaba be-aiñ bad ka kuna ka long kumba T.10,000.
“Haba ñiah kali, wat dih kyiad namar phin ym lah ban teh lakam, haba la shoh u khawiang, phim tip kaei kaba dei – kaba lait bad phi ñiah shongshit. Kumta phi buh jingma ym tang ïa ka jingim lajong hynrei jong kiwei kumjuh,” u la ong.
Halor ka jingñiah kali kiba dang khynnah ka rta, utei u heh pulit u la ong ba bun na ki jingjia aksiden ki jia na kane ka daw naba kim sngewthuh ïa ki kyndon.
Haba kdew ïa ka Section 199 (A), u la ong ba ka tnad ka la ban jur ba kane ka treikam ym tang ki nongñiah ba dang khynnah ka rta, hynrei ïa ki kmie ki kpa ha kaba kin hap shim ka jingkitkhlieh bad ki lah ruh ban shah set along na bynta 6 bnai lada ki khun (ki bym pat kot ka rta ban ñiah kali) ki don bynta ha kino-kino ki jingjia aksiden.
Shuh shuh u la kyrpad ïa baroh kiba wan sha ka jingïalang ban pynsaphriang ïa ka khubor ha la ki ïing ha sem, skul bad kolej khnang ba ki briew kin sngewthuh halor ka jingshngaiñ ha ki surok, kumjuh ka jingtreilang jong baroh kan wanrah ïa ka jingkylla.
Kumban shu kdew hangne, ka tnad pulit ka distrik ka la ïoh lum haduh T.14,528,700 (2023) bad T.860,000 (Kyllalyngkot-2024) kum ka jingdaiñ kuna na kito kiba pynkheiñ ïa ki kyndon ñiah kali.
