Shillong, Rymphang 14
Ka Hynñiewtrep Integrated Territorial Organisation (HITO) sengkmie ha ka Sngi Balang ka la leit ban aiti da ka dorkhas ha u Symbud Myntri Rangbah ka jylla bad uba dei peit ruh ïa ka tnat kam pohïing ka jylla, u Bah Prestone Tynsong, halor ka jingdawa ban ai jingpynshai ha kaba ïadei bad ka jingpynkynriah kam hapoh ka tnad pulit nalor ka por kaba la buh ïa ki ban trei ha kato ka jaka.
Haba kren sha ki lad pathai khubor ha Shillong Press Club, u Bah Donbok Dkhar uba dei u President ka HITO, u la ong ba ka jingkyntu bad ka jingkyrpad jong ka seng na ka sorkar ban pynbeit ïa katei ka bynta ka dei hadien ba ka seng ka la pan da ka RTI na ka tnad kam pohïing jong ka jylla ha ka 20 tarik u Nailur 2022. Hadien ba ïoh ïa ka jubab na ki jingkylli kiba ka seng ka la buh haduh 10 tylli, na ka liang ka tnad kam pohïing ka jylla kam lah satia ban ai ïa kitei ki jingpynshai ba la pan da ka seng. Kumta kane ka pyni shai ba ka kwah ban buhrieh ïa ka jingdkoh treikam jong ka tnad kam pohïing ka jylla ban pyntreikam ïa ka Meghalaya Police Act, 2010.
U Bah Donbok u la ong ba la ju ïohi ruh ba na liang u Bah Prestone Tynsong u la ju ong ba kane ka sorkar Meghalaya Democratic Alliance- 2.0 hapoh ka jingïalam jong ka National People’s Party (NPP) ha ka jingsynroplang bad ka United Democratic Party(UDP), Hill State People’s Democratic Party (HSPDP) bad ka Bharatiya Janata Party (BJP) ka ju kam ïalade ba ka dei ka sorkar kaba ju bud katkum ki kyndon aiñ, hynrei u Bah Donbok u la ong ba lada ki dei shisha kita kiba bud katkum ki kyndon aiñ ki dei ban pyntreikam ïa ka kyndon katkum ka Meghalaya Police Act, 2010 12(B).
“Lada ki long shisha kita ki bym ju pynkheiñ ïa ka aiñ bad kiba shna ïa ka aiñ, ki dei ban pyntreikam ïa kane ka kyndon katkum ka Meghalaya Police Act, 2010 12 (B) kaba ong, “Ki ophisar kiba dei ki Director General of Police; Addl. Director General of Police, Law and Order; Inspectors General of Police; Range Deputy Inspectors General of Police, District Superintendents of Police, Sub-Divisional Police Officers, Circle Inspector ne ki Officer In-charge jong ki thanat ka por ba la buh ka dei tang 2 snem”, la ong u Bah Donbok.
Ka seng ka la kyntu ïa ka sorkar ba ka dei ban leh eiei halor kane namar kumba la lap, la lap ba ki don ki pulit ophisar kiba la don ha kajuh ka kam la palat 15 snem ha kaba ki la shah pynkynriah kam tang hapoh Shillong bad ha East Khasi Hills District ym sha kiwei-kiwei ki distrik.
“Ki don ki ophisar kiba shong hangne, ynda ngi la lap katkum ka jubab jong ka RTI, ki ong ba kim dei nangne napoh ka East Khasi Hills. Haba kim dei balei ki shong hangne? Ki dei ban ailad ïa kiwei keiñ”, la ong u Bah Donbok.
U la ong ba lada ka sorkar kam leh eiei halor kane ka bynta, ka paw shai ba kane ka sorkar ka dei tang ka sorkar kaba heh tang ka tyngam ban ïoh jingmyntoi na ka bynta ïalade shimet.
U la ong ba katkum ka jingïoh pdiang ïa ki jingujor ki don haduh 44 ngut ki ophisar kiba shong hapoh East Khasi Hills ha kajuh ka distrik naduh Sub Inspector (SI) haduh ba kin da long Deputy Superintendent of Police (DSP) ki don hangne bad ki don ruh kiba dang shu shongthait shen.
“Na ka liang jong ngi, ngi khuslai namar kiba don hok ban ïoh kim ïoh katba ki bym dei pat ki ïoh”, la ong u Bah Donbok.
Haba kylli halor ka jingshah pynkynriah kam jong u SP City, u Bah Vivek Syiem bad u SP ka East Khasi Hills District, u Bah Sylvester Nongtnger, u Bah Donbok u la ong ba kane ka jingpynkynriah kam ïa kitei ki pulit ophisar ka long kaba bha namar kaei kaba ki leh ki la sdang na ka kyrdan SP ter ter sharum hynrei ym dei pat ban kut ka jingpynkynriah kam tang ïa kitei ki ophisar kata ruh shwa ka ilekshon namar la ïohi ba ha ka ilekshon kaba la dep ka la don ka jingkynriah ïa ki pulit ophisar hynrei tang katto katne por eiei pat ki la wan biang kijuh ki briew.
