Shillong, Rymphang 14
Ka jingjyllei jong ka jingshalan ïa ki mar bam na Shillong sha Bangladesh ka la pynlong ïa ki shipai BSF kiba ap pahara ha khappud ban bat lut ïa baroh ki kali ha Ladbakli kaba hap ha Mawsynram Block, ka lad ban leit sha Balat bad Ranikor, South West Khasi Hills District.
Katkum ka dur-khih ba la ïoh ringdur da ki ‘riew paidbah la ïohi ba ki trok kiba dei ki Pik-up bad Tata Mobile kiba kit ïa ki mar ki mata ki la shu ïeng ha shi lynter harud surok namar ka jingshah bat ha ki BSF naduh ka janmiet jong ka Sngi Ba-ar haduh ka Sngi Balang.
Ka daw kaba pynlong ïa ki BSF ban bat ïa kitei ki trok namar ki la ïoh jingtip ba ka jingjyllei jong ka jingshalan ïa ki mar ki mata na India sha Bangladesh kaba la long jan man ka sngi kat haduh ba ki mar ki mata ha India ki la kiew dor kynsan-kynsan.
Katkum ka jingbatai ki paidbah kiba shah bat ïa ki kali ha Ladbakli ki la ong, kine ki kali ki dei kiba kit ïa ki mar ki mata, ki soh ki jhur ban leit die sha Nolikata Border Haat kaba dei ban long mynta ka Sngi Balang bad don ruh kiba dei ban leit sha Balat.
Kine ki shipai BSF kiba bat ïa ki kali ki dei kiba ap pahara ha Balat hynrei ki la wan ban ap ha Ladbakli kat haduh ba kiba thmu ban leit die ïa ki mar sha Nolikata Border Haat ki la sahkut lut.
Kat haduh ba thoh ïa kane ka khubor la ong ba bun ki kali ki la shu ïeng sah ha katei ka jaka namar ym shah ban kiew ne hiar, katba ki kali kit mar kiba leit sha Balat Border Haat kaba long ha ka Sngi Ba-ar ym shym la bat.
