Shillong, Rymphang 14
Ka jingthmu ban khang shipor ïa ka jingkieng Umïam kan nym pat treikam noh mynta u bnai namarba la buh ba kan sa treikam hadien 15 sngi, kata, tang mar ïa sdang u bnai ban wan.
U Chairman cum Managing Director ka Meghalaya Energy Corporation Limited (MeECL), u Sanjay Goyal u la ong ba ha ka jingshisha, ki kam ban rah ïa ka jingkieng shalor na ka bynta ban thep ‘bearing’ thymmai dei ban sdang mynta u bnai Rymphang, hynrei namarba dang hap ban pynbiang ïa ki jingdonkam, la pynkynriah noh da 15 sngi bad ki kam ki lah ban sdang haba kut artad une u bnai lane mar ïa sdang u Lber.
Ka jingkhang shipor ban ïaid ki kali lyngba ka jingkieng Umïam ka long kaba donkam ha ka por ba rah ïa ka jingkieng shalor bad ha ka por ba pynhiar biang ïa ka jingkieng shapoh ynda la dep bujli ïa ki ‘bearing’.
Dang shen, u Myntri ka tnat bording, u AT Mondal u la ong ba yn sa pynbna ïa ka sngi na ka bynta ban rah ïa ka jingkieng shalor ban bujli ïa ki ‘bearing’ khnang ban khang shisyndon ïa ki kali ban ïaid lyngba ka jingkieng Umïam.
U Mondal u la ong ba yn sa pynbna paidbah ban khang ïa ka jingkieng Umïam khamtam ha ka por ban rah ïa ka jingkieng shalor bad ha ka por ba pynhiar biang shapoh ïa ka jingkieng ynda la dep ban thep ïa ki ‘bearing’ kiba thymmai.
Hadien ba la rah ïa ka jingkieng shalor, yn dang lah ban shah ïa ki kali rit ban ïaid da kaba buh ïa ka ramp bad ym dei ban palat ïa ka 4 metric ton ha kaba ki kali barit khamtam ki Ambulance ki lah ban ïaid.
Ha kajuh ka por u Mondal u la pyntip ba ka jingmaramot ïa ka bynta ba den ïa ka pung Umïam kaba la ïaid shakhmat kan dep hapdeng 3 ne 4 bnai.
Kumta u la kyntu ïa ki kali kiba dei ban ïaid lyngba ka jingkieng Umïam ban ïaid lyngba kiwei pat ki surok kiba la pynbeit ban ïaid ki kali la ka dei kiba wan kiew sha Shillong bad kiba hiar na Shillong.
Ka surok kaba la don lypa ban ïaid ki kali rit ban poi sha Shillong ka dei na Umroi sha Umrynjah, Mawsiatkhnam, Mawtawar sha Mawlai bad ki kali kiba hiar na Shillong ruh ko hap ïaid lyngba kane kajuh ka surok lyngba ka Mawlai ban poi sha Umroi.
