Shillong, Rymphang 14
Ka Khasi Students’ Union (KSU) Laban Circle ka la aipor 15 sngi ïa ka Sorkar ba kan kyndang noh ïa baroh kito ki shong ba sah be-aiñ ha Maxwelton Estate lym kumta ka seng kan hap ban shim da kiwei pat ki lynti.
Ha kaba ïadei bad kane, ki nongïalam ka KSU Laban ha ka Sngi Balang ki la leit ban ïakynduh ïa ka Deputy Commissioner (DC) ka East Khasi Hills da kaba la aiti ruh ïa ka dorkhas halor katei ka jingdawa.
Ha ka kyrwoh khubor na ka KSU, la ong ba kane ka mat ka la sahkut tang ha ka miej jingïakren naduh u snem 2022 bad kam shym la don kano-kano ka jingpynbeit na ka liang ka Sorkar bad ka ophis Deputy Commissioner ban weng ïa kine ki briew ba sah be-aiñ bad kat nang mih ka por, ki briew ki nang jyllei bad nang rung khlieh shuh shuh ki bar jylla ha kane ka jaka.
Ka KSU ka la pynpaw ba kine ki briew kiba sah be-aiñ ha kane ka jaka kaba hap hapoh ka municipal area, ki ri masi, ki pyntuid jaboh shapoh ki nala, ki wah bad kane ka ktah lut ïa ka koit ka khiah jong ka shnong ka thaw. Ki la ong ba ha municipal area, ka aiñ kam shah ban ri jingri hynrei ki bor pynïaid ki matlah bad kim shym la leh eiei halor kane ka bynta.
Shuh shuh la ong ba ha kaba ïadei bad kane ka bynta, ka seng ka la ïakynduh na ka por sha ka por ïa ki bor ka Shillong Municipal Board bad ha ka 5 tarik u Jylliew 2023 ka la buh dorkhas bad maham tyngeh ba ka SMB ka dei ban shimkhia ban kyndang ïa kine ki briew. Na ka liang ka SMB ki la mynjur ha kato ka por bad ki la phah byrta sha kine ki briew hynrei ka shu kut noh tang ha ka jingdaiñ kuna hynrei ka jingïakren ka kylla noh ba ka SMB kam shym don ka bor ban pynmih ïa kine ki briew, bad ka seng ka suba jur ba ka don eiei sha lyndet ba ka kylla ktien ka SMB.
Ha kawei pat ka liang la ong ba kine ki briew kiba sah be-aiñ hynrei ki ïoh ïa ka bording, ka um khlem kano kano ka jingsiew. Na ka por sha ka por la ju ïohsngew ruh ba ïa kine ki briew la bei pisa da ki kynhun shitniam jong ki Hindu. Kane ka jaka ka la long ruh kum ka ktem drok, kam leh awria, ka tuh ka thiem bad kane ka buh jingma ïa ki nongshong shnong baroh.
Nalor kane ka KSU ka la ong ba kaba kham sngew thamula ka long ba kane ka jaka ka don marjan bad ka Assembly hynrei ki nongmihkhmat ka jylla ki long kiba matlah bad man ka por ki leit sha Assembly hynrei kim shim lah ban peit bad khmih ïa kane ka jaka. Namar kata, ka seng ka kyntu ïa baroh ki nongmihkhmat ka jylla ba ha kane ka Assembly ka ban wan, ba kin sangeh ban hiar bad peit bad khmih ïa kane ka jaka, kin sa lap ïa ka jingjaboh, jingsma iwli ba mih na kane ka jaka.
Kane kan long ka jingïakynduh kaba khatduh na ka liang ka KSU ban ujor ïa ki bor pynïaid bad lada kim lah ban leh eiei halor kane ka bynta hapoh 15 sngi ka seng hi kan shim ïa la ka jong ka sienjam. Ka seng ka kwah ban ïaid da ka lynti ba jai-jai ryngkat ki kyndon aiñ hynrei lada ki bor pynïaid ki leh matlah, ka seng kan hap ban shim hi ïa ka aiñ ha kti na bynta ka bha ka miat jong ka jaidbynriew, la pynkut ka kyrwoh na ka KSU.
