Nongpoh, Rymphang 14
Kawei ka longkmie ka la duh noh ïa ka jingim na ka jingshah bat bording ilektrik ha ka Sngi Ba-ar katba ka dang thmu ban leit wad jhur khlaw ryngkat bad ka khun ha kawei ka khlaw kaba don kham pajih na ka shnong Umran Dairy ha Ri Bhoi District.
Katkum ka jingtip ba la ïoh lum, la ïathuh ba katei ka longkmie kaba la tip kyrteng kum ka Kong Edwina Lyngdoh Lyngkhoi (52 snem) kaba dei ka nongshong shnong jong ka Umran Dairy, ka la mih na la ïing ryngkat bad la ka khun ban leit wad ïa ki jhur khlaw ban bsa ïa la ka ïing ka sem kumba ju long manla ka por namar ka dei kaba wan na ka longïing kaba duna ka ïoh ka kot.
La ïathuh ruh, katba katei ka longkmie ka dang ïaid lynti, ka la kum ïuh ïa u sainar ilektrik uba la dkut bad hap ha madan kaba la pynlong ban shah bat bording ilektrik tad haduh ba kan duh syndon ïa ka jingim ha katei hi ka khlaw. Na ka liang ka khun jong ka kaba don marjan, ka la ïohsngew nyngkong ïa ka jingsawa bad leit ban peit mar mar bad ïohi pynban ïa la ka kmie kaba la thiah lyngktar na ka jingshah bat bording ilektrik.
Na ka liang katei ka khun, ka la ïathuh ruh ba hadien ba ka la ïohi ïa la ka kmie ba ka la ngat ha katei ka apot, ka la pyrta bad wad jingïarap na ki briew ba marjan. Kumta dei tad haduh ka jingpoi jong ki para shnong bad ki pulit ba la pynkit sha Nongpoh Civil Hospital na ka bynta ban pyndep ïa ki jingdonkam katkum ki kyndon aiñ.
Na ka liang u Rangbah Shnong ka Umran Dairy, u Bah Lambor Bina, u la ïathuh ba na ka liang jong ki briew shnong ruh tang mar ïa ïoh jingtip halor katei ka jingjia, ki la mareh bran-bran sha katei ka khlaw bad lap ïa katei ka longkmie kaba la shah bat bording ilektrik na ka daw jong utei u sainar uba la dkut bad hap ha madan. Utei u rangbah u la pyntip ruh ba utei u sainar bording ilektrik lehse u dei uba dang shu dkut dang shen namar kam shym la don satia ka jingthut ha ka bording ilektrik ha ka shnong ka thaw.
Shuh shuh utei Rangbah Shnong u la buh ka jingkyntu ïa ki bor ba dei khmih jong ka bording ilektrk ba kin long kiba peitngor bha ban khmih ba kan nym don kano kano ka jingthut ha kaba ïadei bad ka jingïaid jong ki sainar ilektrik khamtam ban pom ïa ki dieng ki siej kiba wit khnang ba kum kine ki jingjia ba sngewsih kin nym jia shuh hadien habud. Ha kajuh ka por u la buh ruh ka jingkyntu ïa ki paidbah nongshong shnong ba kin long kiba husiar bad phikir bha ïalade ban lait na kum kine ki jingjia ba sngewsih.
