Mawkyrwat, Rymphang 14
Ki nongïalam bahakhmat ka Regional Democratic Alliance (RDA) ba kynthup ïa ka seng UDP bad HSPDP ki la hiar sha Mawkyrwat na ka bynta ban sdang ka jingïalap ilekshon ban pan jingkyrshan na ka bynta u kyrtong MP ka RDA u Bah Robertjune Kharjahrin.
Kine ki nongïalam ki kynthup naduh u Bah Metbah Lyngdoh, Bah KP Pangniang, Bah Kyrmen Shylla, Bah Olan Sing Suin, Bah Renikton Lyngdoh Tongkhar, Bah Pius Marweiñ, Bah Mitchel Wankhar lem bad kiwei kiwei.
U Bah Robertjune haba ai jingkren ha kane ka jingïalang u la ther tyngeh ïa ki seng na rithor bad kiwei ki seng saiñ pyrthei kiba ju kynnoh ba kin leh aïu kita ki seng riewlum tang uwei ne ar ngut ki MP ha Lok Sabha bad bynrap “Ki da ong ruh ïa ki kyntien hana ba kita ki seng riewlum ki kut tang ha Khanapara.”
U Bah Robertjune u la ong ba imat ki la bakla pule ïa ka histori, ar ngut ki MP na ki seng riewlum ki la phah shaduh Delhi kata u Bah Hopingstone Lyngdoh bad u Prof. GG Swell.
Une u kyrtong MP ka RDA u la ong ruh ba haduh mynta ki dang don kiba dang artatien ïa ka bor jong ki seng riewlum; lada don kum kita kylli ïa ki, phi shong ha ka jylla aïu? Bad ïa ka jylla Meghalaya hato ym dei ba ka APHLC bad ka HSPDP ba pynïoh ïa ka jylla.
“Lada ngi la lah ban pynkohnguh ïa ka Indira Gandhi ban ai ïa ka jylla ba pura, hato ngim lah mynta ban pynkohnguh ïa ka sorkar India ban ai ïa ka ILP, ban pynbeit ïa u pud u sam, ban pynrung ïa ka ktien Khasi ha ka khyrnit kaba phra, ngi la lah ban pynkohnguh shisien bad ngi dang lah haduh mynta,” la ong u Bah Robertjune.
Ha kawei pat ka liang u Bah Metbah Lyngdoh, President ka UDP u la pynpaw ïa ka jingkmen ba kum ki nongïalam ki la ïoh ban sdang ïa ka jingïalap ilekshon na ka shnong jong u kyrtong u Bah Robertjune Kharjahrin.
U Bah Metbah u la pynpaw ruh ïa ka jingkyrmen ba lyngba ka jingïatreilang hapdeng ka UDP bad HSPDP hapoh ka lama jong ka RDA, u Bah Robertjune un sa poi sha ka thong ha kane ka ilekshon MP ka ban sa long.
U la pynkynmaw ruh ba ha ka ilekshon MLA kaba la dep, ka UDP ka dei ka seng kaba wan ba ar ha ka jingïoh bun tam ki ‘vote’. U la ong ba lada kine ar seng ki ïatreilang, lada kheiñ lang sa ïa ka ‘vote’ jong ka HSPDP, ka la dei ka ‘vote’ kaba bun tam ha ka jylla bad khlem artatien kin poi ruh sha ka thong ha kane ka ilekshon.
U la pynkynmaw ruh ba ïa ka RDA la sdang naduh u snem 2017 bad ïa kaei ba la sdang ki kwah ban pynneh, wat la kin don shibun ki jingeh ki jingïatyngkhuh ha ki jingïaid lynti hynrei u la ong ba kita kin nym long pat ki daw ïa ka jingïapait jingïapra jong kine ki artylli ki seng hynrei kin long ki maw jingkieng sha ka thong.
Kumta na ka liang u Bah Metbah u khot u wer ïa ki paidbah ka Mawkyrwat bad Ranikor Konstitwensi ba kin ai ka jingkyrshan ïa une u samla uba la bit la biang ka jingnang jingstad bad u samla uba la bit la biang ban leit ïasaid hapoh Parliament.
