Jowai, Rymphang 14
Ki Waheh Shnong jong ka Nongsning bad Umrasong ha ka Sngi Ba-Ar ki la leit ban ïakynduh ïa u Member Secretary jong ka Meghalaya State Pollution Control Board (MSPCB) halor ka jingai laisen ïa san tylli ki karkhana thang dewïong lane ki ‘coke plant’.
Kine ki karkhana ki kynthup ïa ka M/s MM Minerals, M/s Unique Industry (2nd Chimney), M/s Presidium Breez, M/s Magic Coke bad ka M/s Ioanis Industries Private Limited (Chimney 2) kiba don hajan jong kine ki shnong.
Ha u kyrwoh khubor ba la phah ha ka Sngi Balang, kitei ki Waheh Shnong ki la ong ba ka M/s Presidium Breez ka la pynjulor ïa ka tyllong um jong ka shnong Nongsning.
Na ka liang ka Dorbar Shnong Nongsning ka la ong ba ka la buh ruh ïa ki jingujor la bunsien naduh u snem 2022 sha u Deputy Commissioner ka East Jaiñtia Hills bad kiwei kiwei ki tnat ba dei khmih ïa kane ka kam ba ym dei ban ai laisen ïa kine ki karkhana namar ki pynjaboh ïa ka lyer bad mynta sa ka tyllong um ka la shah ktah kaba baroh ki nongshong shnong jong kane ka shnong ki pyndonkam.
Hynrei ki nongshong shnong ki la kyndit ban ïohi ïa ka jingsdang pyntrei biang ïa kine ki karkhana ha kine ki sngi wat hapdeng ki jingujor bad jingïakhih pyrshah ban ai laisen ïa kum kine ki karkhana.
La ïoh jingtip ba ha u snem 2023 kine ki karkhana ki la ïoh laisen ban tei ha kane ka shnong. Kitei ki shnong ki la ong ba ka pyni ba ka sorkar kam suitñiew ban sngap ïa ka jingud u paidbah bad ka la pynlong aiñ ïa kine ki karkhana be-aiñ.
Da ka mynsiem ba sngewdiaw ïa ka jingbym sngap ka sorkar bad jingud u paidbah, u Bah Dipsing Bareh, Waheh Shnong ka Nongsning, Bah Elias Tlang, Waheh Shnong ka Umrasong, Bah Maniwel Suja, u nongshong shnong ka Nongsning, u Bah Reading War, Advisor ka ECC, ryngkat ki Secretary shnong ki la ïakynduh markhmat ïa u Member Secretary ka MSPCB ban pan jingshai halor kane bad ban ai jubab hapoh une u bnai.
Lada ka MSPCB kam lah ban teh lakam ïa kane ka jingeh, ki nongshong shnong kim banse ban hap ban shim pat da kawei ka rai kaba tyngeh, la ong u Bah Dipsing.
Na ka liang u Bah Maniwel u la kdew ba lada duh kine ki tyllong um kan wanrah ka jingeh ka bakhraw ïa ki nongshong shnong namar ki dei tang kine ki tyllong um ba lah ban pyndonkam.
