Mawkyrwat, Rymphang 14
U President jong ka Hill State Peoples Democratic Party (HSPDP) u Bah KP Pangniang, ha ka Sngi Balang haba ther tyngeh ïa u nongïalam jong ka Voice of the People Party (VPP) u Bah Ardent Miller Basaïawmoit, u la ong ba um tip shuh kaei ka jingkylla kaba u Bah Ardent u kwah.
U Bah Pangniang u pynpaw ïa kane haba ai jingkren ha ka jingïalang ïalap ilekshon jong ka Regional Democratic Alliance (RDA) kaba la long ha Mawkyrwat na ka bynta ban pan jingkyrshan ïa u Bah Robertjune Kharjahrin ha ka ilekshon MP ka ban sa long shen.
U Bah KP Pangniang u la ong, “Ngam sngewthuh shuh ba u Bah Ardent uba dei u nongïalam ka VPP u kwah ïa ka jingkylla kaba kumno, namar kaei kaba nga tip ka long ba u phet na kawei ka seng sha kawei pat ka seng namar u kwah jingkylla.”
“U la ïakhun kum u kyrtong shimet, hadien kata u la rung sha ka UDP bad ong ba un wanrah jingkylla, hynrei hadien u la phet bad pynïasoh sha ka HSPDP bad hangne ruh u la ong ba un wanrah jingkylla hynrei nangne ruh u la phet bad thaw ïa ka VPP ban wanrah ka jingkylla,” la ong u Bah Pangniang.
“Ka ri jong ngi ka don ïa ka jaidbynriew kaba kyrpang, ngi shitom ban ïakren ïa ka jingkylla, ha ka jingshisha ngi hap dei ban ong ban pynneh ban pynsah bad ban pynbha, tang katta ka la biang. Halor kita ki jingkwah wanrah jingkylla, ka jingeh ka long ba ki paidbah ki klet noh ban kylli, phi leh aïu pat ha ka por ba phi don ha ka UDP, HSPDP.”
Shuh shuh ha kawei pat ka liang u Bah Pangniang u la pynpaw ba ka la donkam ka jingïatylli jong ki seng riewlum. U la ong ba la 46 tylli ki snem ngim shym la ïoh shuh ïa u nongmihkhmat na ki seng riewlum ka daw ka dei namar ki ïapait ïapra.
U la ong ruh ba ka jingsngewkhlaiñ jong ki seng riewlum ha la ka jong ka bor ka jingstad bad ha la ka jong ka jinglah kim poi shaei-shaei jin lada don ka jingïatreilang ha kawei ka lama kawei ka shap naduh mynshwa la dei ban jop ha ki ar bad lai tylli ki ilekshon MP kiba la leit.
