Shillong, Rymphang 14
U nongïalam jong ki Khasi ha Bangladesh uba dei u President barim ka Khasi Welfare Society (KWS) bad uba bat kum u Organising Secretary ka Bangladesh Indigenous People’s Forum jong ki jaidbynriew rit paid ha Bangladesh u Bah Andrew Sohlamar, u la pynpaw ka jingsngewsarong haba la ïoh ban tei ïa u motdur jong u khlawait ka jaidbynriew u Tirot Sing ha Bangladesh.
U Bah Andrew Sohlamar uba dei u khun jong u Pa’iem Wickliffe Syiem uba sah mynta ha Bangladesh ryngkat bad ka ïing ka sem u la pynpaw ka jingsngewkmen haba ka sorkar Meghalaya ha ryngkat ka Sorkar India ka la ïoh ban tei ïa u motdur u Tirot Sing ha Dhaka kaba dei ka nongbah jong ka ri Bangladesh.
Ïa u motdur jong u Tirot Sing yn plie pyrda ha ka 16 tarik u Rymphang 2024 ha Indira Gandhi Cultural Centre (IGCC) kaba don ha Dhaka, Bangladesh da u Symbud Myntri Rangbah ka jylla u Bah Sniawbhalang Dhar ha jingïadonlang u Bah Paul Lyngdoh uba dei Myntri ka tnad Art and Culture ka sorkar jylla bad kiwei.
U Bah Andrew u la ïathuh ba watla ki Khasi ki bun kiba sah ha Bangladesh hynrei haduh mynta um shym la ïoh jingtip ba ka Sorkar India bad Bangladesh ba kin khot ïa ki Khasi ha Bangladesh ban ïadon ryngkat ha katei ka sngi ba plie ïa u motdur jong u khlawait ka jaidbynriew.
U la ong ba wat la u khlem shah khot, hynrei u sngew sarong ba ïa u motdur jong u Tirot Sing u Syiem ka Hima Nongkhlaw uba la ïakhun pyrshah ïa ki shipai phareng la lah ban tei mot ha Dhaka.
“Lada ngim shah khot hynrei lada dei ka sngi ban kynmaw burom ïa ka lyngkhuh sngi ïap u Tirot Sing ngin sa leit buh syntiew ha u motdur ha Dhaka” u la ong.
U la ïathuh ba ki Khasi kiba sah ha Dhaka ki bun tangba ki kham bun ki dei kiba leit pule.
Kumban shu pynkynmaw, ka jingtei mot ka sorkar jylla ïa u Tirot Sing ha Dhaka ka long ban pynsah jingkynmaw naba u la ïap ha Dhaka ha ka por ba ki phareng ki la set byndi ïa u hadien ba u la shah kem na ka jingïakhun laitluid pyrshah ïa ki.
Kum ban shu kdew ïa une u mot jong u Tirot Sing la kit noh na Shillong sha Dhaka ha ka 2 tarik Rymphang 2024 uba la dep pynwandur da u Bah Rafael Warjri.
