Nongstoiñ, Rymphang 14
Ki nongïalam ka Voice of the People Party (VPP) ha ka Sngi Balang ki la hiar sha sor Nongstoiñ ban pynshai paidbah ïa ki nongrim jong ka seng bad ka thong na ka bynta ka Jylla.
Ha kane ka sngi ïa ka jingïalang la pynlong hakhmat ka ïew Nongstoiñ ba la ïadonlang u Bah Ardent M Basaïawmoit, President ka VPP lem bad 3 ngut ki MLA, kynthup u Dr. Ricky AJ Syngkon, uba dei u kyrtong MP ka VPP ha ka juh ka por u General Secretary ka VPP, ki ‘riew rangbah bad kiwei kiwei.
Haba ai jingkren, u Bah Ardent u la pynshai sha ki paidbah halor ka jingpyrshah jong ki MLA ka VPP ïa u Lat ka Jylla haba un kren da ka ktien Hindi hapoh ka ïingdorbar thawaiñ ha kaba u la ong ba ki nongïalam ka VPP kim dei ki briew ki bym tip aiñ.
U Bah Ardent u la ong, “San snem mynshwa ym don ba nud ban kren pyrshah ïa u Lat ka Jylla haba u kren da ka ktien Hindi, hynrei la rung ki 4 ngut ki MLA jong ka VPP bad ngi la ong ba ngim pdiang ïa ka jingkren Hindi u Lat bad lyngba kane ka jingïeng ïaleh pyrshah ki MLA ka VPP la ïaroh da bun ki briew kiba na kiwei pat ki Jylla.”
“Sngew thamula ban tip ba kita ki MLA kiba ju wan sha u paidbah ban pynithuh ba ki dei na ki seng trai Ri ki seng riewlum ki ong sa lei da kren da ka ktien Hindi,” la ong u Bah Ardent ha kaba u la sei bad pyni syndon da ka kot aiñ ha ïingdorbar bad ban pule ruh ban pynshai sha ki paidbah ïa kata ka Rule of Procedure and Conduct of Business.
Halor ka jingmih surok ki nongïalam ka VPP ban ïakhih halor ka jingweng kam ka sorkar ïa ki ophisar ba la shongthait na ka shlem treikam ka Lokayukta, u Bah Ardent u la pynshai da kaba u la ong ba ki nongïalam ka VPP kim dei ba ki kwah thaw jingkulmar ban mih youtube hynrei ki kwah ban kren.
“Ngi te ngim sngew bieit haba ngi ïeng na ka bynta u paidbah, ngin mih surok ngin thiah surok ngin shong surok ruh ngin nym lehraiñ na ka bynta jingbit ka jingbiang u paidbah,” la ong u Bah Ardent da kaba u la ther tyngeh ïa kiba pynsngewthuh bakla ïa u paidbah ban ong, ban da la long seng saiñ pyrthei ka ibieit ban ïa mih surok bad leh kum ki seng ïakhih.
U la ong ba ka saiñ hima-sima jong ka VPP ka dei ka saiñ hima-sima kaba khampher bad ka la dep ong lypa naduh ba la seng ba ka VPP ka dei kata ka seng saiñ pyrthei kaba kham pher ban na kiwei pat ki seng saiñ pyrthei, u la pynpaw da kaba ong, “Ngin hikai ban tei pat ïa ka jaidbynriew ka jong ngi.”
U Bah Ardent u la kynthah ruh ïa u Myntri Rangbah ka Jylla halor ka jingkren jong u sha ki lad pathai khubor halor ka jingweng kam ïa ki ophisar da kaba u Myntri Rangbah u la ong ba lada thung da ki ophisar ba la shongthait ka wanrah ïa ka jinglutphut ïa ka sorkar. Halor kane u Bah Ardent u la buh jingkylli kylla ba lada ki 3 ngut ki ophisar shongthait ki pynstang ïa ka pla sorkar hato ki spah ngut ki consultant ki chairman ki vice chairman ki pynrben ïa ka pla ka sorkar?
Namar kata, u la kyntu ïa ki paidbah ba kin long kiba stad ba kin nym bakla ha kane ka ilekshon, da kaba u la ong ruh “Long ma phi ki trai ïa ka kam wad ap ban da khot lane wer ban leit thep vote bad nga kwah ba ym dei ban leh sting ïa ka ilekshon MP.”
