Shillong, Rymphang 14
Ka Sorkar Jylla ka la nang pynkhreh ïa ki jingdonkam na ka bynta ban pynheh ïa ka surokbah ban pynkylla noh sha ka surok Four-Lane naduh Lad Umroi shaduh bakut u pud ka Meghalaya ha East Jaiñtia Hills district.
Na ka liang ka Sorkar Jylla ka la nang thawlad ban pynbiang ïa ka jaka khnang ba ka Sorkar Pdeng lyngba ka National Highway Authority of India bad National Highway Infrastructure Development Corporation Limited (NHIDCL) kan shimti ban shna ïa kane ka surokbah kaba ngiam ban ïaid saw tylli ki kali.
Na ka liang u Symbud Myntri Rangbah u Bah Prestone Tynsong uba peit ïa ka tnat shna surok ha Jylla, u la ong ba ka Sorkar Pdeng ka la mynjur ban shna pynheh ïa kane ka surokbah sha ka Four-Lane naduh Lad Umroi shaduh bakut ka Meghalaya ha East Jaiñtia Hills district kata ha Malidor.
Ha kawei pat ka liang, u Bah Tynsong u la ong ba ka surokbah NH-6 kaba la sniew naduh Lumshnong sha thaiñ Umkiang bad u la dep pynsngew sha ka Ministry of Road Transport and Highways ha kaba u Secretary kane ka tnat un sa wan jurip hashwa ban poi ka aïom slap.
Haba ïadei bad ki jaka ba jur ka jingtwa ha ki katto katne ki bynta jong kane ka surokbah, u la ong ba ym don lad da kawei pat ban kiar hynrei hap shim ki lad ki lynti ïada na ka jingtwa.
U la ong ruh ba ka surok kaba ïaid napoh (tunnel) ka dei ka jaka ba jur ka jingtwa bad ha kaba ki la wan bun ki riewshemphang ban khmih bniah ïa ka jinglong jingman jong ka jaka hynrei ym lap lad da kumwei pat.
Haba ïadei bad ka jingkieng ha Sonapur namar ka lah ban don jingma namar ka jingtwa kaba la jia ha u snem ba la dep, u Bah Tynsong u la ong ba kane ka jingkieng ka long kaba shngaiñ namar ba la dep ban leh ïa ka ‘safety audit.’
Ka NH-6 ka dei ka surokbah kaba pynïasoh ïa ka Meghalaya bad ka Barak Valley ha Assam nalor ka Tripura, Mizoram bad ka bynta jong ka Manipur kum ka Jiribam.
