Shillong, Rymphang:
Ki bor pynïaid ilekshon ka East Khasi Hills ki la bthah ïa ki Booth Level Officer (BLO) ban pyntikna halor ka jingdon ki ‘Electoral Photo Identity Card’ (EPIC) kiba ki nong aplai ki la ïohpdiang ki bym dei kiba shisha.
“Lada kino-kino ki nong aplai ki ïoh pdiang ïa palat kawei ka EPIC, ïa kine dei ban shim noh mardor bad dei ban pyndap ïa ka phom 7 bad ki nong aplai ki dei ban soi khnang ban leh ïa ka jingpyndam kaba donkam,” ong ka hukum ba la pynmih da ka Deputy Commissioner ka East Khasi Hills, Kong Rosetta Mary Kurbah ha ka Lah Sngi U Blei.
Ka hukum ka ong ruh ba ki BLO ki dei ban ban phah ïa ka kaiphod ba ki la shimkhia halor kane ka kam hapoh 2 sngi.
Ïa kane ka hukum la pynmih hadien ka jingsaphriang ha ki lad pathai khubor ba ki nongthep ‘vote’ hapoh ka Jylla ki la ïoh pdiang bun tylli ki EPIC.
