Jowai, Rymphang:
Ka Kur War Mynso ha ka 13 tarik Rymphang ka la plie paidbah ïa ka ïingdorbar jong ka Kur kaba don ha ka shnong Mynso A, kaba hap hapoh ka Elaka Mynso West Jaiñtia Hills ba la tei ha ka jinglut kaba T.45 lak tam bad kaba la tei naduh u snem 2017.
Ïa ka jingïalang la pynïaid da u Lionel T. War, Chairman Inauguration Committee ha ka jingsakhi lang u Rev. Dr. Fr. Ioannis War kum u kongsan, u Rev. BB Lamin kum u symbud kongsan, u Dolloi ka Elaka Mynso, ki Waheh Shnong bad Secretary Shnong Mynso A, Mynso B bad ki khun jong ka Kur kiba najan bad najngai.
U Chinta War, Secretary Kur War Mynso u la ai ki jingkren pdiang, u Jimmy War, Chairman Kur War Mynso u la ïathuh ïa ka khana lyngkot jong ka Kur, katba u Manlang War, Secretary Inauguration Committee u la ai ki kyntien khublei.
U Rev. BB Lamin u la ai ki kyntien kitbok kitrwiang ïa baroh ki khun ka Kur bad u khmih lynti ba ka jingdon jong ka ïing dorbar kan long ka jingkyrkhu bakhraw bad ban nang lah ban saiñdur saiñdar ïa ka miat ka bha ha ka imlang sahlang jong ki khun ka Kur ha baroh ki liang.
U Rev. Dr. Fr. Ioannis War ha ka jingkren u la ong ka long ka sngi jong ka jingkmen ban don bynta lang bad ki para Kur ba mih na kajuh ka Seinjait “Ka Oor War”.
Ki kyntien shoh jingmut kiba u Rev. Dr. Fr. Ioannis War u la pashat hakhmat uba bun ba lang dei kiba u kdew kyrpang ïa ka bynta jong ka ‘Oor War bad U Mookheng-Kheng’ kiba long ka dak ka shin jong ka jingieid, ka jingïatylli bad ka jingburom mar kylliang. Nangta u la kyntu ïa ki khun ka Kur ban ri ïa ka burom jong ka Kur bad im ha ka nongrim jong ka shankylliang ka rapkylliang.
Kum ka dak ban pynsah jingkynmaw ïa kane ka sngi ka la don ka jingpynkup burom ïa arngut ki longkmie ka Kur kiba la kynjoh sha 80 snem kumjuh ïa ki khun samla kiba la wanrah nam rah burom ïa ka Kur ha ki eksam bapher bapher.
La pynphuh-pynphieng shuh shuh ha kane ka sngi da ki jingrwai jingshad ba la shim bynta da ki khun ka Kur War na Mynso, Jowai, Kyndong bad na Namdong.
