Shillong, Rymphang:
Ka HYC-Sohïong Zone ka la byrngem ban khang tala ïa ka Sohïong-CHC hadien ka jingujor na ki paidbah nongshong shnong ka thaiñ namar ka jingbym biang ka rukom sumar ha kane ka jaka.
“Hadien ba ngi la ïoh jingujor na ki paidbah halor ka jingbym ïaid beit ïaid ryntih ka rukom sumar ha Sohïong-CHC, ngi la wan ban jurip kynsan ïa kane ka jaka sumar bad ynda ngi la poi hangne, ngi lap ba tang iwei i doktor ruh im don, ki nongtrei ruh ki duna bad wat tang iwei ruh iba shim dawai ne thiah pang im don ha kane ka jaka sumar,” la ong u President ka HYC-Sohïong Zone, Bah Purningstar Shabong.
Haba kdew ïa kawei na ki jingdkoh treikam ba hakhmat jong katei ka CHC, u Bah Shabong u la ong ba kane ka jaka sumar kam lah ban ai jingsumar ïa ki briew bad kim banse ban leit noh sha Mawphlang CHC na bynta ka jingsumar.
“Kaei ka jingïapher hapdeng kawei ka CHC na kawei pat, kumba ka long, ka Mawphlang ka la kiew bha. Ha ka jingshisha, lada kren ïa ka jingsdang jong ka CHC, ka CHC Sohïong ka la kham hashuwa ban ïa ka CHC Mawphlang, hynrei ha Mawphlang ki la bun kiba biang hynrei hangne pat ym biang,” la ong uei u nongïalam.
Haba pynsngew ba ka jingthmu jong ka CHC ka long ban ai jingsumar bad shakri ïa ki paidbah ha ka koit ka khiah, u Bah Shabong u la ong ba kumba ka long mynta, ki paidbah nongshong shnong ka Sohïong ki la duh jingshaniah ïa kane ka jaka sumar.
“Kan don jingmut aïu ban buh ïa kane ka CHC lada kane ka jaka sumar kam pynbiang doktor bad haba ki paidbah kim shaniah shuh, kan don jingmut aïu ban buh shuh ïa ka,” la buh jingkylli u President ka seng ïa ka Sorkar.
Haba kyntu ïa ka Sorkar ban pynbiang ïa ki doktor bad ki nos ha katei ka jaka sumar, u la kubur ba don ki nos ha ki Sub-Centre kiba shakri hok ïa ka kam, hynrei ha kawei ka liang, u la pynpaw ka jingsngewsih ba ki nongtrei ha ka CHC kim don satia ka jingkitkhlieh.
“Mynne haba ïakren bad ka doktor…mar sien kren, ka la kren da ka jingdom, jingbitar bad pyni ïa ka jingleh baheh. Kaei kaba ngim itynnad ka long ba ngi wan na ka seng bad ka kren ha kato ka rukom…kaei ka ban jia ïa ki paidbah lada ki wan ïakynduh ïa ka,” la ong u Bah Shabong.
Shuh shuh haba bynrap ba ki doktor ki dei ban wanrah ka jingïajan haba ki kren bad ki briew, u la ong, “Hynrei ban pyni noh da ka jingdom, nga sngew ba lehse dei ha kane ka bynta ba kane ka CHC ka duh jingshaniah na ki paidbah.”
Ka seng ka la byrngem ruh ïa ka Sorkar ba lada kam lah pynbiang ïa ki doktor bad ki jingdonkam ha katei ha jaka sumar, kata kam banse ban khang tala noh ïa katei ka CHC ha kano-kano ka sngi.
