Shillong, Rymphang 15
Ka Meghalaya State Government Employees’ Federation (MSGEF) ha ka jingïalang kaba la long ha ka 12 tarik Rymphang hadien ba ka lah ïoh ïa ka shithi na ka liang u General Secretary jong ka Meghalaya Veterinary Services Association, ka la pynrem jur ïa ka jingshah pynjynjar bad pyndik pyrshah khlem nongrim ïa u Dr. S. Buam, A.H & Vety. Officer, da ki BSF ha Muktapur, West Jaiñtia Hills ha ka 11 tarik Rymphang.
Ha u kyrwoh khubor, ka Kong Bansharai Kharchandy, General Secretary ka MSGEF, ka la ong ba ka Federation ka khia jingmut halor kum kine ki jingjia ki bym poi pyrkhat ban jia na ka liang ki BSF namar ka long ka jingkhñiot beiñ bad jingïuhroit ïa ka hok longbriew manbriew jong utei u doktor.
Kumta ka Federation ka la kyntu ïa ki bor ba dei khmih ban shimkhia ïa kane ka jingjia bad ban shim ruh ïa ki lad ban pynsaja ïa ki BSF kiba la leh pyrshah bad pyndonkam bakla ïa ka bor ha kaba ïadei bad katei ka jingjia pyrshah ïa u para nongtrei sorkar jong ka jylla Meghalaya bad ka khmih lynti ba nangne shakhmat kum kine ki jait jingjia kin ym jia shuh.
