Shillong, Rymphang 15
U Symbud Myntri Rangbah ka jylla, Bah Sniawbhalang Dhar, u Myntri ka tnat Art & Culture, Bah Paul Lyngdoh, u Chairman ka Meghalaya State Planning Board, Bah Metbah Lyngdoh, Kong Ampareen Lyngdoh, Myntri ka tnad ka koit ka khiah ki la poi mynta ka janmiet jong ka 15 tarik Rymphang sha nongbah Dhaka, Bangladesh ban leit plie pyrda ïa u motdur jong u Tirot Sing uba dei khlawait ka jaidbynriew ka ban long ha ka 16 tarik u Rymphang.
Nalor kitei ki nongïalam jong ka sorkar jylla, la synranlang ruh da u Bah Hamlet Dohling uba dei u nongaibuit jong u Myntri Rangbah ka jylla, u Bah Titosstarwell Chyne uba dei u CEM barim ka KHADC, Bah Federick Kharkongor uba dei u Commissioner and Secretary ka tnat Arts and Culture, u Syiem ka Hima Nongkhlaw ryngkat ki samla kynthei bad shynrang ban ai jingrwai bad shad tynrai kiba poi palat 60 ngut tang na Shillong.
Ïa ka prokram ban plie ïa u motdur jong u Tirot Sing kan sdang ha ka por 10:00 baje mynstep ha Indira Gandhi Cultural Centre (IGCC) kaba don ha Dhaka, Bangladesh bad ha ka por janmiet pat kan don ka prokram shad bad rwai tynrai ba la pynkhreh da ka kynhun jong ka Indian Council for Culture Relation, Shillong.
Ka jingtei mot ïa u Tirot Sing Syiem ha Dhaka ka dei namar ha ka por ba u long kum u Syiem ka Hima Nongkhlaw kaba mynta ka hap ha Eastern West Khasi Hills District namar u la shah ïap ha patok mynba la set byndi ha ka sorkar phareng ha Dhaka namar u ïakhun pyrshah ïa ki shipai jong ka sorkar phareng kiba thmu ban thombor ïa ka jaidbynriew Khasi.
Haba ïakren bad u Bah Rafael Warjri uba dei u nongshna ïa u motdur jong u Tirot Sing uba la leit sah lypa sha Dhaka naduh ka 10 tarik u Rymphang, u la ïathuh ba ïa u motdur jong u Tirot Sing uba naduh syngkai la dep pynïeng ha Dhaka bad kaba sah mynta sa tang ban plie noh da u Symbud Myntri Rangbah ka jylla u Bah Sniawbhalang Dhar.
U la ïathuh ki don palat 60 ngut na Shillong kiba la poi sha Dhaka mynta ka janmiet jong ka 15 tarik Rymphang namar ki don kiba wan da ka liengsuiñ bad ki don kiba wan na surok Dawki shaduh Dhaka.
Nalor nangta, u la ïathuh ba ka prokram kan sdang naduh ka por 10 baje mynstep bad ha ka por janmiet kan don ka jingshad bad rwai tynrai da ka kynhun ICCR na Shillong.
U la ïathuh ba ïa ki kyrteng jong ki Khasi kiba sah ha Bangladesh la dep ai kyrteng ha ka sorkar Bangladesh hynrei ka shong ha ki ba kin khot.
U Bah Rafael u la pynpaw ka jingsngewkmen ba ïa u motdur jong u Tirot Sing kaba la shna ha Shillong la lah ban pynpoi suk bad pynïeng ha Dhaka ban pynsahnam ïa ka jaidbynriew Hynñiewtrep uba dei u khlawait uba la ïakhun thma ïa ki phareng ha ki por mynshwa.
