Shillong, Rymphang 15
Ka Joint Action Committee (JAC) jong ka dong Namchiang, Elaka Narpuh, East Jaiñtia Hills District ha ka Sngi Palei ki la byrngem ban pynlong da ka jingïakhih lada ka Sorkar kam shim khia noh mardor ban maramot ïa ka surok National Highway-6 na Lumshnong sha Malidor.
Kane ka jingbyrngem jong ka JAC ka la long hadien ba kane ka committee hapoh ka jingïalam jong u Waheh Shnong ka Umkiang kum u Chairman bad u Waheh Shnong ka Pyrtakuna kum u Secretary ryngkat ka jingsynran lang kiwei ki ‘riew rangbah bad ki nongïalam shnong ha kane ka sngi ki la leit ban aiti da ka jingthoh ha u Symbud Myntri Rangbah ka Jylla u Bah Prestone Tynsong uba peit ïa ka tnat PWD (Roads) ban dawa ba ka sorkar ka dei ban maramot noh mardor ïa ka surok National Highway-6.
Kumta ka JAC ka la aipor ïa ka Sorkar Jylla ba kan maramot noh ïa kane ka surok hapoh ka 15 sngi naba ka la pynsyrtok haduh katta katta ïa ka leit ka wan bad ka rah ka rong jong ki paidbah ka East Jaiñtia Hills District.
Nalor kane, ka JAC ka la maham ruh ba kan pynlong da ka jingpakhang surok kaba 24 kynta hapoh ka Dong Namchiang kata naduh ka shnong Tongseng shaduh Umkiang Ratacherra Malidor haduh khappud Assam lada ka Sorkar kam lah ban shna noh mardor ïa kane ka surok, la ong u Chairman ka JAC Bah Lasting Pala bad u Secretary Bah Love You Bareh.
Kum ban shu pyntip hangne, ha ka 25 tarik, Nailur 2023, ki paidbah kiba la ai jingkyrshan ïa ka KSU East Jaiñtia Hills District ki la pynlehraiñ ïa ka National Highway Authority of India (NHAI) da kaba leh mynleh khwai dohkha bad thung kba hapdeng ka surokbah NH-6 kaba la dap da ki thliew ki syar namar ka jingjot rathai jong kane ka surok kaba la pynsyrtok haduh katta katta ïa ki nongleit nongwan.
Ki paidbah bad ki dkhot jong ka KSU ki la pynlong ruh ïa ka jingïakhih da kaba thiah hapdeng surok kum ka jingpyrshah ïa ka jingleh mynthi jong ka NHAI halor ka jingdawa jong ki paidbah ban shna pynbha ïa kane ka surok.
U Secretary ka JAC bad Rangbah Shnong ka Pyrtakuna Bah Love You Bareh, u la ïathuh ba u Symbud Myntri Rangbah u la pyntip sha ka JAC ba ïa kane ka surok la dep ban ai ‘work order’ ban maramot bad ka jingpyntrei ïa ka kam kan sa sdang noh shen.
U la pyntip ruh ba ka JAC ka la ïakren bad u Bah Prestone halor ki kam ba ïadei bad ka jingrung be-aiñ jong ki nong Bangladesh sha Meghalaya haba kyrpad ba ki BSF ki dei ban ïada ïa ka khappud na ka bynta ka jingshngaiñ jong ki trai shnong.
“Ngi la ïakren ruh halor ka jingdonkam ban kyntiew kyrdan ïa ka Umkiang PHC sha ka CHC ha kaba u Symbud Myntri Rangbah u la kular ba un sa tuklar ïa ka kam,” la ong u Bah Bareh.
