New Delhi, Rymphang 15
Hadien ba ka Supreme Court ha ka Sngi Palei ka la pyndam noh ïa ka ‘Electoral Bonds Scheme’ kaba la treikam naduh 2018 bad kaba ailad ïa ki nongshong shnong ne ki kompani ba kin noh synñiang sop-sop sha ki seng saiñpyrthei khlem da donkam ban pyntip paidbah, ka kynhun Association for Democratic Reforms (ADR) ka la pynmih ïa ki jingkheiñ jingdiah kiba pyni katno ki seng saiñpyrthei ki la ïoh lum pisa lyngba kane ka lynti.
Ha u kyrwoh khubor, ka ADR ka la ong ba hapdeng u Lber 2018 bad Kyllalyngkot 2024, la thied ïa ki ‘Electoral Bonds’ kiba shongdor T. 16,518.1099 klur. Kine ki long katkum ka jingtip ba la ïohlum lyngba ka aiñ RTI na ka State Bank of India (SBI). Dei tang ka SBI kaba lah ban die ïa kine ki ‘Electoral Bonds’ naduh ba sdang pyntreikam ïa ki.
Nalorkata, ka ADR ka la ong ba kiba bun tam ki ‘Electoral Bonds’ ki dei kiba la thied ha ka dor kaba T. 1 klur bad haba kheiñ kyllum, ka long T. 15,631 klur.
Shuh shuh ka ADR ka la ong ba hapdeng u snem 2017-18 haduh 2022-23, ka BJP ka la pynbna ba ka la ïoh ïa u synñiang ba haduh T. 6,566.125 klur lyngba ki ‘Electoral Bonds’.
Kaba wan ba ar ka dei ka seng Congress kaba la pynbna ba ka la ïoh T. 1,123.3155 klur katba ka seng All India Trinamool Congress (AITC) ka la ïoh T. 1,092.9876 klur. Kiwei pat ki seng saiñpyrthei ki long katkum kane ba la ai ryngkat bad ka khubor.
