Shillong, Rymphang 15
Ka nongïalam ka Congress, ka Deborah C Marak kaba dei ruh ka Symbud Myntri Rangbah barim bad MLA barim, ka la ong ba ka Congress kan sa jop da ka jingkyrshan jong ki paidbah ym ban kheiñ katkum ka jingdon ki MLA sha ka Ïingdorbar Thawaiñ ka Jylla.
Haba kren shaphang ka jingpynkhreh ka Congress ïa ka ilekshon MP ha Rilum Garo kaba don 24 tylli ki MLA konstitwensi, ka Deborah ka la ong ba ka NPP ka ong ba ka Congress ka dei ka seng bym larkam shuh khamtam ha Rilum Garo, hynrei ki dei ban kynmaw ba ka NPP ruh ka don tang 2 ngut ki MLA ha ka ilekshon MP ha u snem 2014, tang u James PK Sangma bad u Nihim D Shira.
“Ki paidbah ki kyrshan ïa ka NPP ha kato ka por ha ka ilekshon MP ha u snem 2014. Kumta ngi ka Congress ruh wat lada ngi don tang uwei u MLA na Rilum Garo ha kane ka ilekshon MP mynta u snem 2024, hynrei u kyrtong jong ngi u Saleng A Sangma un sa ïoh jingjop da ka jingkyrshan ki paidbah,” la pynpaw ka Deborah da ka jingsngewskhem.
Ka NPP kan pynïakhun biang da ka MP kaba mynta ka Agatha K Sangma na Tura katba u MLA ka Congress na Gambegre konstitwensi, u Saleng A Sangma un long u kyrtong ka Congress ha kane ka ilekshon.
Ka Deborah ka la ong ba ki paidbah ka Rilum Garo ki kwah ban ïohi ka jingkylla ha kane ka sien ha ka ilekshon MP na Tura Lok Sabha konstitwensi bad ki paidbah ki phaikhmat sha ka Congress ban phah nongthawaiñ sha Parliament.
Ka la ong ba ki paidbah kim artatien ban jied ïa u Saleng ha kane ka ilekshon ban mihkhmat ïa ki paid Garo ha Ïingdorbar Lok Sabha (Parliament).
Haba kylli shaphang ka rukom treikam ka MP kaba mynta ka Agatha K Sangma, kane ka nongïalam ka Congress ka la ong ba ki paidbah ki la ud ba ka MP kam ju kham don ha Garo Hills bad kim ju kham ïakynduh ïa ka, hynrei ki kham ïohi tang ynda la dei ka por ilekshon ha kaba ka MP ka leit lang kylleng bad ki Myntri Sorkar lem bad u Myntri Rangbah sha ki prokram ba pynlong da ka Sorkar.
Haba kylli kiei kita kiba ka Congress kan pynsngew sha ki paidbah ha kane ka ilekshon, ka Deborah ka la ong ba kumba ka long mynta, ka Congress ka dang shim ki jingpynsngew na ki paidbah ha kylleng ka ri bad shen yn sa pynrung ha ka mat treikam ka ban sa pyllait paidbah da ka seng.
Ka Deborah ka dei ruh kaba la ïakhun teng ïa ka ilekshon MP na Tura ha u snem 2009 bad ka la rem salit ha ka Agatha K Sangma.
Ka Deborah ha u snem 2009 ka la ïakhun kum ka kyrtong ka Congress bad ka la rem tang da 17,945 ‘vote’.
Ka Agatha ka la ïoh 154,476 ‘vote’ kum ka nongjop bad ka Deborah kaba wan ba-ar ka la ïoh 136,531 ‘vote’.
