Shillong, Rymphang:
U Bah Adelbert Nongrum uba dei u nongmihkhmat ka North Shillong Constituency, u la ong ha ki 51 tylli ki snem kiba la dep ïaid, u la ïohi ba ha ka kyrteng jong ka ‘Development’ ne ka roi ka par ka la kylla pynban sha ka ‘Devil-lopment’ kaba la knieh bad lute noh ïa ka hok.
“Ha ka kyrteng jong ka roi ka par, la lute noh ïa ka hok bad ka roi ka par kaba ngi khmih lynti kum ka jylla kaba ïaid lynti 52 tylli ki snem mynta, lada ngi phai ka koit ka khiah, ka pule puthi, ka ïoh kam ïoh jam baroh ki hap leit shabar”, la ong u Bah Adelbert.
Haba ai jingkren ha ka jingïalang pdiang ïa ki nongïalam bad ki dkhot jong ki seng saiñ pyrthei bapher bapher kiba la wan pynïasoh bad ka VPP kaba la long ha ka Sngi Ba-ar, u Bah Adelbert u la ong ba ka long kaba sngewsih ban da phai haduh 52 snem ka kyrta ka jingïaid lynti jong ka jylla, ka jylla ka dang hun ha ka jingshah ïalam bakla.
U la ong ba kitei ki dkhot bad ki nongïalam jong kiwei-kiwei ki seng saiñ pyrthei kiba la wan pynïasoh bad ka VPP ha katei ka sngi, u ngeit skhem ba ki wan pynïasoh namar ba ki la sngewthuh ïa ka nongrim jong ka seng.
“Ngi donkam mynta ban phai sha kata ka nongrim bad ka thymmei ban wad kaei ka daw kaba la pynlong ïa ka Jaitbynriew jong ngi ba kan tlot, ba kan swai, ba kan pang bad ba kan khrew kumne kumba ka long”, la ong u Bah Adelbert.
