Shillong, Rymphang 15
Ka jingweng ïa ki ophisar kiba la shongthait na ka Meghalaya Lokayukta ka la kylla long ka mat kaba khluit ha ki sngi kiba la leit ha kaba la kynnoh ruh ba ka jingweng ïa kita ki ophisar ka long ban ïada ïa ki briew kiba la shah kynnoh bamsap haba ïadei bad ka jingpyntrei ïa ki projek jong ka Garo Hills Autonomous District Council (GHADC) khamtam namarba don uwei u MLA uba dei u bahaïing jong u Myntri Rangbah ka Jylla.
Ban ïoh jingshai bad sngewthuh kham bha, la kata ka jingweng ïa ki ophisar kiba la shongthait ka ktah ne em ïa ka jingtohkit haba ïadei bad ka jingmudui kaba la phah sha ka Lokayukta, uwei na ki nongsaid aiñ ne muktiar jong ki nongmudui ïa ka mukotduma sha ka Lokayukta, u Pillan T Sangma u la batai sha ki lad pathai khubor kiba la ïoh ban ïakren bad u.
U Pillan, uba long u nongsaid aiñ na ka bynta kito kiba la ujor haba ïadei bad ka jingkynnoh bamsap ha ka rukom pyntrei ïa ki projek jong ka GHADC, u la ong ba, ïa ka jingujor ha Lokayukta pyrshah ïa uwei u MLA, u Sanjay A Sangma bad kiwei pat kiba shah kynnoh lang, la dep ban tohkit da ka Lokayukta bad la dep ruh ban phah ïa ka chargesheet sha Ïingkashari ha kaba kane ka mukotduma mynta ka la don ha Ïingbishar jong u nongbishar ha Tura na ka bynta ka jingbishar bad ban ai ïa ka rai.
U Sanjay A Sangma u dei u MLA bad uba dei ruh u bahaïing jong u Myntri Rangbah u Conrad K Sangma.
“Ki don ar tylli ki jingujor kiba ka Lokayukta ka la dep ban chargesheet bad ki la don mynta ha Ïingkashari na ka bynta ban tian bishar, bad hap ap ban ïaid bad dep ka jingbishar hashwa ba Ïingkashari, ha Tura kan ai ïa ka rai,” la ïathuh u Pillan.
Kum ban pynkynmaw, u Sanjay A Sangma uba dei u MLA ka Mahendraganj konstitwensi, u la shah ujor lem bad kiwei pat ki briew halor ka jingkynnoh bamsap haba pyntrei ïa ki projek jong ka GHADC ha ka por ba u Sanjay u khlem pat shahjied kum u MLA.
“Haba ïadei bad ka jingujor pyrshah ïa u Sanjay A Sangma bad kiwei pat, ka jingtohkit ka la dep bad ka Lokayukta ruh ka phah ïa ka chargesheet, bad mynta kane ka kam ka la don ha Ïingkashari ban bishar bad ban ai ïa ka rai,” la ong u Pillan.
Haba kylli, la ka jingweng noh ka Lokayukta ïa ki lai ngut ki ophisar kiba la shongthait kan ktah ne em haba ïadei bad ka jingtohkit ïa ki jingujor kiba la phah sha ka Lokayukta, u Pillan u la ong ba ka jingweng ïa ki ophisar bad thung bujli da kiwei pat, kan nym ktah namar ki ophisar kiba wan thymmai ruh ki hap ïaid katkum ka aiñ bad pyndep ïa ka kamram ba la bynshet ha ki.
“Kumta ka jingweng ïa ki ophisar kiba la shongthait na ka Lokayukta kam ktah ïa ka jingujor jong ngi bad kam ktah ïa ka jingtohkit namar ka Lokayukta ka la dep ban chargesheet naduh shwa ban weng ïa ki ophisar kiba la shongthait. Mynta ki jingmudui ki la don ha Ïingkashari ban bishar hadien ba ka Lokayukta ka la dep ban chargesheet,” u la bynrap.
U la ong ruh ba haba ïadei bad ka jingujor ïa u Sanjay A Sangma bad kiwei pat, ka jingtohkit da ka Lokayukta ka la dep la kham slem ha u snem ba la dep, bad ka Lokayukta ka la dep ruh ban chargesheet. Kaba sah ka dei sa tang ka jingtian bishar da ka Ïingkashari jong u nongbishar ha Tura bad yn ap ïa ka Ïingkashari ban rai bad leh katkum ka aiñ.
U Pillan, u dei uwei na ki nongsaid aiñ uba ju ïakhun ïa ki kam bamsap, bad long u nongsaid aiñ jong ki nongujor na Rilum Garo ha kiba bun tylli ki mukotduma.
Haba kylli la kito ki ophisar kiba la shongthait kiba la shahweng na ka kam ha ka Lokayukta, u Pillan u la ong ba lada kito ki ophisar ki sngew ba ki la shah ïuhroit ïa ka hok jong ki, ki lah ban leit sha Ïingbishar ban pynsngew ïa ka jingeh ong ki bad ka Ïingbishar ruh kan sa ong la kata ka dei kaba beaiñ ne kaba dei, bad hangta yn sa shai bad hap ban pdiang ïa kaei kaba ka Ïingbishar ka ai rai.
Ka Lokayukta dang shen, ka la weng ïa ki lai ngut ki ophisar kiba la shongthait na ka kam, bad ha ka jaka jong ki, la thung bujli da ki ophisar kiba dang don ha kam bad kiba dei ha ka kyrdan Secretary shaneng.
