Shillong, Rymphang 15
Ki nongïalam ka Khasi Jaiñtia Christian Leaders’ Forum (KJCLF), Shillong, ha ka Sngi Thohdieng ki la pynpaw ïa ka jingsngewdiaw halor ka jingshah pyndik bad jingshah byrngem jong ki shlem ai jinghikai ba la pynïaid da ki Balang Khristan.
Ha u kyrwoh khubor, u Secretary ka KJCLF, u Rev. Dr. Edwin H. Kharkongor, u la ong ba ka paw ba ki don ki kynhun kiba dap da ka jingisih pyrshah ïa ki rit paid ha kane ka thaiñ kiba la shim da ki sienjam ban pyndik ïa ki da kaba pynkylla sohpdung ïa ki jaka ai jinghikai bad ki shlem kiba ai jingmyntoi ïa ki samla bad ka lawei jong ki.
Ha kajuh ka por, katei ka kynhun ki nongïalam niam ki la pynpaw ïa ka jingsngewkhia halor ka jingwanrah jong ka sorkar Assam ïa ka aiñ rew ba la tip kum ka “The Assam Healing (Prevention of Evil) Practices Bill, 2024.”
Kane ka aiñ rew ka khang ïa ka jingai jingkoit da kaba shu leh jadu lane kata ka ‘magic healing’. Lada lap ïa kiba donkti ha kine ki kam, kin shah kem bad shah set patok ha ryngkat ka jingsiew ïa ka kuna. Lah ruh ban kdew ba katei ka aiñ rew ka pynleit jingmut ïa ki rukom ai jingsumar kiba ïadei bad ka jingkyllut, jingbym lait kren, jingbym ïohi ki khmat, jingduna ha ki dkhot met bad kiwei.
Ka KJCLF ka la ong ba da ka jingwanrah ïa katei ka aiñ rew, ki bor sorkar ha Assam ki pyrshang ban ktah ïa ka jingngeit, jingduwai bad ka jingim ba kynja mynsiem jong ki briew.
Na ka liang ka KJCLF ka la kyntu ïa ki paid nongshong shnong ka Assam bad ki briew kiba la kham ïar ka jingmut ha ka thaiñ ba kin ïakhun pyrshah ïa kito kiba wanrah ïa ka jingisih para briew.
Ka la kyntu ruh ïa ki kmie ki kpa bad ki nongshong shnong ban ïada ïa ki shlem ai jinghikai bad ïa ki nonghikai kiba la aiti ïalade ban long kum ki nongai jingmut na ka bynta ka bha ka miat jong ki khun jong ki.
Nalorkata, ka KJCLF ka la ong ba ki nongshong shnong ki dei ban ïada ïa la ka jong ka jingngeit bad ki dei ban kren pyrshah ïa ki bor kiba kwah ban pyntroiñ ïa ka jingim kaba suk kaba saiñ hapdeng ki jaitbynriew bapher-bapher.
Lah ban kdew ba dang shen, u Myntri Rangbah ka Assam, u Himanta Biswa Sarma, u la pynpaw ba ka sorkar ka kwah ban teh lakam ïa ki kam ïalam niam lane ‘evangelism’. “Ngi kwah ban teh lakam ïa ki kam ïalap niam, bad ka jingwanrah ïa katei ka aiñ rew (“The Assam Healing (Prevention of Evil) Practices Bill, 2024″) ka long kaba donkam. Kane ka long ka mat kaba kham kongsan namar la pyndonkam ïa ka ban pynkylla niam ïa ki jaitbynriew kiba dei ki riewlum. Ngin sa wanrah ïa kane ka aiñ rew namar ngi ngeit ba dei ban pynneh ïa ka jinglong kumjuh ha kaba ïadei bad ka niam,” u la ong haba kren sha ki lad pathai khubor ha Assam ha ka 12 tarik Rymphang.
