Jowai, Rymphang:
Ka Ïingbishar bakhlieh duh ka Jylla ka la mynjur ban ai por artaïew ïa ka JHADC ban ai jubab ne ka ‘affidavit’ halor ka jingbym pyntreikam ïa ka hukum jong ka High Court ban pyllait tulop ïa ki nongtrei ka JHADC hapoh hynriew bnai naduh u bnai Lber , 2023.
Ïa katei ka jingmynjur la ai da ka High Court ha ka por ka jingshim bishar ïa ka ‘Contempt Petition’ hapdeng ka JHADC Staff Association pyrshah ïa ka JHADC bad Sorkar Jylla ha ka 6 tarik mynta u bnai.
Kumban shu pynkynmaw, ka JHADC Staff Association ka la ujor da ka ‘Contempt Petition’ pyrshah ïa ka JHADC & Sorkar Jylla ha ka 19 tarik u bnai Nohprah, 2023. Ka jingshim bishar kaba nyngkong eh ka la long ha ka 19 tarik u bnai Nohprah, 2023.
Ka ‘Contempt Petition’ ka long ka mukotduma ha ka Ïingbishar lada ïa ka hukum jong ka Ïingbishar ym shym pyntreikam da ki liang pyrshah ïa u nongujor mukotduma.
Ban pynkynmaw, ka High Court ha u bnai Lber, 2023 ka la ai ïa ka jingbishar halor ka mukotduma Writ Petition (Civil) kaba la ujor da ka JHADC Staff Association pyrshah ïa ka JHADC bad Sorkar Jylla.
Ha katei ka jingbishar ka ïingbishar ka la hukum ïa ka Sorkar Jylla ban pyllait noh pura ïa ka bhah kaba dei hok ïa ka JHADC hapoh hynriew bnai bad kumjuh ruh ïa ka JHADC ban siew noh ïa ka tulop sha ki nongtrei jong ka hapoh hynriew bnai.
Ka jingap kmang kaba la hynriew bnai da ki nongtrei jong ka JHADC ka la kut ha u bnai Risaw 2023 ha kaba na ka liang ka Sorkar bad JHADC kim patiaw ïa ka hukum jong ka Ïingbishar.
Hapoh kitei ki hynriew bnai, ki nongtrei jong ka JHADC ki la pynlong jingïakhih la lai sien.
Shuh shuh ka Council ban pynjem ïa ka jingeh jong ki nongtrei ka la siew ïa ka tulop jong ki haduh u bnai Jymmang, 2023.
