Shillong, Rymphang 15
Ka Dorbar Mang Tyngka ka ba-ar jong ka Ïingdorbar Thawaiñ kaba khatwei ka Jylla kan sdang da ka jingkren jong u Lat ha ka Sngi Thohdieng.
Ka ju long ka rukom pynïaid ïa ka Dorbar Mang Tyngka, ba ha ka sngi ba sdang ïa ka dorbar, hap ban ai jingkren u Lat ka Jylla sha ki dkhot ka Ïingdorbar Thawaiñ.
Kane ka dei ka sien ba-ar ba u Lat ka Jylla, u Phagu Chauhan un ai jingkren ha ka Dorbar Mang Tyngka jong ka Ïingdorbar Thawaiñ kaba khatwei ka Jylla. Ka sien banyngkong ba u Lat u la ai jingkren ka dei ha u snem ba la dep ynda ba la thaw ïa ka Ïingdorbar Thawaiñ kaba khatwei ka Jylla hadien ka ilekshon MLA, 2023.
Ha ka sngi sdang jong ka dorbar, ym pat da don than kiei kiei ban ïakren namar kaba kham kongsan ka dei ka jingkren jong u Lat, nangta bud sa ka jingwanrah ïa ki kaiphod, ki kyndon bad ki aiñ-rew kiba hap ban mynjur da ka Ïingdorbar Thawaiñ ha ki sngi shong dorbar.
Ha ka sngi basdang ka dorbar, ka ju don ruh ka jingkynmaw burom ïa ki MLA, ki MP bad kiwei kiwei ki ‘riew pawkhmat kiba la khlad noh, ym tang kiba dei na Meghalaya hynrei na kiwei pat ki Jylla ha ka ri.
Katkum ka jingpynbeit, ïa ka jingïatai halor ka jingkren jong u Lat yn sa pynlong ha ka 19 tarik u Rymphang bad ïa ka Mang Tyngka ka Jylla na bynta u snem mang tyngka 2024-2025 yn sa wanrah ha Ïingdorbar ha ka 21 tarik u Rymphang da u Myntri Rangbah u Conrad K Sangma uba peit ïa ka tnat pla tyngka.
