Shillong, Rymphang 15
U kyrtong shimet ban ïakhun ïa ka ilekshon MP Lok Sabha na Shillong konstitwensi Bah Peter Shallam u la ong ba ym dei tang kiba don spah ban ïakhun ïa ka ilekshon hynrei ki bym don spah ki lah ban ïakhun ilekshon ban ïada ïa ka jaidbynriew.
U Bah Shallam, 58 snem karta, u dei uba shong ba sah ha Laitkor bad u dei ruh u nongïasad aiñ ka Shillong Bar Association u la pynbna paidbah ba un ïakhun kum u kyrteng shimet ha kane ka ilekshon MP Lok Sabha na Shillong konstitwensi.
Haba ïakren bad ki lad pathai khubor ha Shillong Press Club, u Bah Shallam u la ong ba ka thong ka jong u ka long ban pynurlong ïa ka ktien Khasi ha ka khyrnit kaba phra, ka Inner Line Permit, ban pynbeit u pud u sam bad kiwei de ka jingeh jong ka jaidbynriew.
U la ïathuh ba um kwah ban shim kabu ïa ki seng saiñpyrthei haba u thmu ban ïakhun ïa kane ka ilekshon. Dei na kane ka daw ba u mih ban ïakhun kum u kyrtong shimet.
U la ong ba lada ki paidbah ki la thait bad ngiah ïa ki kyrtong ne ki seng saiñpyrthei kim dei pat ban pynlehnohei ïa ki ‘vote’ jong ki, hynrei ki dei ban leit jied ïa u kyrtong uba don jingkitkhlieh ïa ka jaidbynriew.
“Nga khlem wan ban ïakhun ïa ka ilekshon ban pynkhyllem ïano-ïano ne kynthoh ïano-ïano namar ban rai ka shong beit ha ki paidbah” u la ong.
Namar kata, u la ong biang ba lada ki paidbah ki ibit ïa u ban long kum u MP ka Lok Sabha un wanrah ïa ki lad aikam ïa ki samla bad ban pynkhlaiñ ïa ka pule puthi bad ïa ka koit ka khiah.
