Shillong, Rymphang 16
U Lamphang ka Ïingdorbar Thawaiñ kaba khatwei ka Jylla, u Thomas A Sangma, u la pynbna ba ka Ïingdorbar ka dang thawlad kumno ban pyndonkam ïa ki kor ki bor na ka bynta ban ïoh pynkylla noh hangto-hangto sha ka ktien Phareng ïa ki jingkren kiba kren ha Ïingdorbar ha ka ktien Khasi, Garo bad Jaiñtia khlem da donkam shuh ban pynkylla da kaba shu thoh.
U Lamphang u la ïathuh ïa kane haba u nongthoh khubor u buh jingkylli hadien ba ka Ïingdorbar ka la pyrshang ban pyndonkam ïa ki kor ki bor ban pynkylla hangto- hangto ïa ka jingkren u Lat kaba u kren ha ka ktien Hindi sha ka ktien Phareng.
Haba kylli la ki MLA ki la lah ne em ban kren ha Ïingdorbar da ka ktien Khasi bad Garo bad ki kor ki bor kiba pyndonkam kin pynkylla hi hangto-hangto sha ka ktien Phareng, u Lamphang u la ong, “Ka Ïingdorbar kan sa wanrah ïa ki kor ki bor kiba lah ban pynkylla hangto- hangto sha ka ktien Phareng haba ai jingkren ha ka ktien Khasi, Garo bad Jaiñtia, bad lada long kaba lah hapoh kine ki hynriew bnai khnang ba yn sa pyntreikam pat ha ka dorbar ka ban sa long hapoh kine ki hynriew bnai ban wan.”
U Lamphang u la ong ba hapoh kine ki hynriew bnai, yn pyrshang ban thawlad ban buh ïa ki kor ki bor kiba lah ban pynkylla hangto-hangto sha ka ktien Phareng haba ki dkhot ka Ïingdorbar ki kren da ka ktien Khasi, Garo bad Jaiñtia.
“Kan urlong ne em, ngim lah ban ong lypa, hynrei ngin thaw ki lad ban pynwandur ïa kane,” la ong u Lamphang.
Nalor nangta, u la kubur ba ha ka jingkren jong u Lat, ki dang don ki jingduna bad jingbymbiang namar ba lehse kin don ki kyntien kiba ym ïahap beit thik haba pynkylla sha ka ktien Phareng katba u Lat u dang ai jingkren ha ka ktien Hindi.
“Ngi dang don ha ka lynti ba kham jngai ban poi sha ka thong ban long janai ha kaba ka jingkren ïa kawei ka ktien kan ïahap beit thik haba pynkylla sha kawei pat ka ktien,” la ong u Thomas.
Ha kawei pat ka liang, ki tiar sngap shkor (headphones) kiba la pyndait ha jaka shong jong ki nongthoh khubor (Press Gallery), ki khlem treikam satia, bad ki nongthoh khubor ruh kim ïohsngew eiei ïa kata ka jingpynkylla ktien hangto-hangto sha ka Phareng ha ka por ba u Lat u ai jingkren da ka ktien Hindi ha Ïingdorbar Thawaiñ.
Hynrei la ïohsngew kyndiang lyngba ki tiar sngap shkor (headphones) ïa kaei kaba u Lat u ai jingkren ha ka ktien Hindi bad ym shym la don kano-kano ka jingpynkylla ktien sha ka Phareng, hynrei ka don ka bynta ba la ïohsngew lang pynban ïa ka sur jingrwai ha ka por ba ai jingkren u Lat.
