Shillong, Rymphang:
Ka Hynñiewtrep Achik National Movement (HANM) Riwar Mihngi Circle, Pynursla ka la pynpaw ïa ka jingbitar halor ka jingjyllei jong ki kam khaïi be-aiñ sha Bangladesh lyngba ka surok Pynursla-Dawki.
Ha kaba ïadei bad kane, ka HANM Riwar ka la phah da ka jingthoh sha u Sub Division Officer (SDO) ka Pynursla Civil Sub Division ban kyntu ba un tehlakam noh ïa ka kam khaïi be-aiñ na thaiñ Pynursla sha Bangladesh.
Kane ka jingbitar jong ka HANM ka la mih halor ka jingjyllei ka kam khaïi be-aiñ ïa ki mar bam mar dih ba kynthup naduh ka shini, piat, phan, ktung bad ki masi ki muid sha Bangladesh lyngba ka surok Pynursla-Dawki.
Ha ka jingthoh ba la phah sha u SDO, na ka liang ka HANM ka la maham tyngeh ba lada ka ophis kam leh eiei noh mardor, ka seng kan mih bad shim hi noh da ki sienjam ba tyngeh nangne shakhmat ban ïakhun pyrshah ïa kane ka kam beaiñ.
U President ka HANM Ri-War Mihngi u la ong, “Ka jingpynkhaïi be-aiñ ïa kine ki mar bam sha Bangladesh ka la wanrah ïa ka jingduna mar bam mar dih ha ka Jylla bad kane kan ktah pat ïa ka dor ka mur jong ki mar bam. Haba khatduh dei u paidbah u ban mad ïa ka jingeh na kane ka kam beaiñ”.
U la ong ba ki kali kit shini, kit marbam bad ki masi ki muid ki ju ïeng da u laiñ naduh Laitlyngkot ter ter sha Pynursla hynrei ki bor ka aiñ ki shu peitkai ïa kine ki kali bad kane ka pynsuba ba imat ka don kaei re kaei ha lyndet ka jingphai khmat lyndet ka aiñ.
“Wat la bunsien ngi la pyntip halor kane, hynrei ki pulit kiba don ha Pynursla kim lah tehlakam satia hynrei mardor ki la kyntait ban leh eiei bad tynrong pynban ïa ka jingkitkhlieh sha ka tnat Custom,” u la ong.
