Shillong, Rymphang:
Ka Hynñiewtrep Achik National Movement (HANM) ha ka Sngi Balang ka la kyntu ïa u Lamphang ka ïingdorbar thawaiñ ka Jylla u Thomas A Sangma ban sdang pyndonkam bad ailad noh ïa ki dkhot ban kren da ka ktien Khasi bad Garo ha ka por ba pynlong dorbar.
U President ka HANM u Bah Lamphrang Kharbani haba kren sha ki lad pathai khubor hadien ka jingïakynduh ïa u Lamphang u la ong, ka HANM ka la ai jingmut ba naduh ka 16 tarik mynta u bnai, u Lamphang u dei ban shah ïa ki dkhot ka ïingdorbar ba kin kren ha ka ktien Khasi ne Garo.
U Bah Kharbani u la ong kane ka jingïakynduh ka seng ïa u Lamphang ka long ban pynkynmaw ba ka ïingdorbar thawaiñ ka jylla ka la shim ïa ka rai ban pynrung ïa ka ktien Khasi bad Garo ha ka khyrnit kaba phra jong ka riti synshar jong ka Ri India. Kumta dei halor kane ka nongrim ba ka seng ka kyntu ban kren ïa ka ktien Khasi bad Garo, bad ai ba ki MLA Khasi kin kren Khasi bad ai ki MLA Garo kin kren Garo bad ban ïa sngewthuh lang donkam ïa ki nongpynshai ne pynkylla ktien.
“Ngi la pynsngew sha u Lamphang ba ai ba ka Sorkar bad ka ïingdorbar thawaiñ kan leh ïa kaba donkam da kaba pyndonkam ïa ki ktien tynrai bad ka HANM kan leh ïa kaba donkam ban leit ïakhih sha Delhi ban pynsngew sha ka Sorkar Pdeng ba ka dei ban ai jingithuh noh ïa ka ktien Khasi bad Garo,” u la ong.
