Shillong, Rymphang 16
Ka Voice of the People Party (VPP) ka la pynpaw ka jingsngewdiaw halor ka rukom long jong ka kynta kylli jingkylli ka ban sa sdang ha ka Lah Sngi U Blei naba ïa kiba bun ki jingkylli kiba kongsan la thep noh shadien.
“Ki don shibun ki mat kiba ngi la pynkhreh ha kane ka sien shong dorbar ba mynta. Ha ka jingshisha, ngi la pynkhreh ïa ki mat ba ïadei bad ka jinglong-jingman ka pla tyngka ka Sorkar, jingeh ki samla pule, jingeh ki nongtrei ‘Casual’ bad kontrak, ka ïoh ka kot, kamai kajih bad kiwei-kiwei,” la ong u MLA ka VPP na Nongkrem, Bah Ardent M. Basaïawmoit haba kren sha ki lad pathai khubor ha ka Sngi Thohdieng.
Ha kawei ka liang, u la ong ba ka seng ka sngewdiaw namar haba peit ïa ka rukom buh jingkylli, i kumba yn ym ïoh ban kren halor ki mat kiba kongsan kiba ka seng ka la khmih lynti.
“Ha ka Lah Sngi U Blei, kan sdang ka kynta kylli jingkylli bad ngi la ïohi ba ki jingkylli kiba donkam ki la dep thep lypa shadien, lehse sha ka nombor ba 19 ne 20. Phi lah ban sngewthuh hi hangne ba kat ka kynta kylli jingkylli kaba ngi lah ban pyndep da bun eh ruh 10 tylli, hynrei kumba ka long mynta, ngam tip la ngin ïoh ne em ban ïatai, ïakren…ban ai jingmyntoi ïa ki paidbah,” u la ong.
U Bah Basaïawmoit u la ong ruh ba kum ka liang pyrshah ha ka synshar paidbah, haba ka Sorkar ka wanrah ïa ki mat treikam, ka dei ka kamram jong ka liang pyrshah ban peit hangno ka jingduna khnang ban kdew lynti bad ba ka Sorkar kan ïoh ban pynbeit na bynta ka jingmyntoi u paidbah.
Shuh shuh u la bynrap, “Nga ngeit ba ngin ïoh hi ka lad…namar kumba ka long, ka sien shong dorbar ruh ka long kaba lyngkot palat…phra sngi bad kaba ngi ïoh ban ïashim bynta bha ka dei tang hynñiew sngi.”
Kum ban shu kdew hangne, ka Dorbar Mang Tyngka jong ka ïingdorbar thawaiñ ka Jylla ka la sdang ha ka Sngi Thohdieng bad kan kut haduh ka 27 tarik mynta u bnai.
