Shillong, Rymphang:
Ka Khasi Students Union (KSU) War Jaiñtia Circle ha ka Lah Sngi U Blei ka la leit ban ai da ka jingujor sha u Sub-Divisional Officer (SDO) ka Amlarem Civil Sub-division halor ka jingleh donbor jong ki shipai BSF langrut ïa u Officer In-charge jong ka Muktapur Veterinary Dispensary u Dr. Seiboklang Buam ha ka Sngi U Blei katba u dang thmu ban leit khwai dohkha ha wah Lakroh.
Ka KSU ka la ong ba kane ka jingleh riewkhlaw jong ki BSF, kum ki bor shipai kiba don ka jingkitkhlieh ban ïada ïa u pud u sam ki dei ban ai ka jingshngaiñ ïa ki paidbah nongshong shnong ym ba kin kylla long ki nongshun bad wanrah ïa ka jingshong syier.
Ka seng ka la phah ruh ïa ka kopi jingujor sha u Deputy Commissioner jong ka West Jaiñtia Hills u Bah BS Sohliya, sha u Chairperson jong ka Meghalaya Human Rights Commission (MHRC), sha u 2nd-in-command BSF bad sha u Myntri ka tnat Kam Pohïing ka Sorkar Jylla u Bah Prestone Tynsong ba kin tuklar halor kane ka jingjia bad ban pynshitom ïa ki arngut ki shipai BSF kiba donkti ban leh donbor ïa u Dr. Buam.
Ha ka ujor, ka seng ka la ong, “Kane kam dei shuh ka jingjia banyngkong. Ki shipai BSF jong ka 4th Battalion ki ju donkti ban pyndik ïa ki nongleit ïew leit hat bad ïa ki nongrep. Ki ju pakhang ïa ka surok bad talasi naphang ïa ki kali kit mar bad ki don ruh ki khep ba wat ki mar ki mata ki shu jah rngai. Hadien ba la pynhap ïa ki mar ki mata na ki kali, ki ieh beit hangto ba ki trai kin kyntiew biang ïa ki mar ha kali bad kane ka ju wanrah ïa ka jingduhnong kaba khraw ïa ki paidbah.”
“Kum ka seng, ngim lah shah shuh ïa ki kam pyntriem pyrshah ïa ki briew jong ngi, da kita ki briew kiba shah bynshet ban ai jingïada. Ngi kyntu ïa ki bor bahalor ban shimkhia halor kane ka jingjia bad ban pynshitom ïa kiba donkti halor kane ka kam khnang ba kum kine kijuh ki jingjia, kin ym jia shuh hadien habud,” la ong ka KSU ha ka dorkhas.
Shuh shuh ka KSU ka la ong ba ka jingleh jong ki BSF ïa u Dr. Seibok ka dei ka jingleh kaba yn nym lah ban pdiang haba la tip pylleiñ ba ki juh don ka jingïakynduh haba ïadei bad bun ki kam, ka jingthmu jong ki ban patan sha Zero Line ka don ka jingmut ba sniew sha lyndet.
Kane ka jingleh jong ki BSF na ka 4th Battalion ka dei ka kam rumar namar ki tip shai kdar ba u dei u nongtrei sorkar bad katta ruh ha ka kyrdan kum doktor, na ka liang jong ka seng ka dawa ba dei ban leh eiei pyrshah ïa kito ki BSF ban ïoh biang ïa ka jingshaniah ha ki shnong khappud.
