Nongstoiñ, Rymphang:
U kyrtong MP jong ka Voice of the People Party (VPP) u Dr. Ricky AJ Syngkon u la ong, “Nga ngam ju don bynta ha ka kam saiñ hima sima, nga long uwei na ki nonghikai ha ka skul bah ha NEHU bad kum u shakri jong u trai, Hynrei kaei kaba nga peit haba nga ïohi ïa kiei kiei kiba jia kiba long ha ka jingïaid lynti jong ka Jylla jong ngi, ka khia ka mynsiem kum u nonghikai haba nga ïohi ïa ki khynnah haba ynda ki la dep ban pule na ka skul bah NEHU ki rung pat sha ka pyrthei kaba dum ka pyrthei ka bym don jingkyrmen.”
U Dr Ricky u la kren ïa kane ha ka jingïalang paidbah ban pynshai ïa ki nongrim ka seng ha ka Sngi Balang ha sor Nongstoiñ, ha kaba u la ong ba haba ïohi ïa ki khun samla, ka khia ka mynsiem. Kum ki nongïalam ka seng ki buh jingkylli ba balei ka long kumne ïa kane ka Jylla bad balei ka lawei ka long kaba dum haduh katta katta? Bad dei haba pyrshang ban wad ïa ki daw la shem ba naduh ba la ïoh ïa ka Jylla kaba pura, la shu ïa kmen ba ïoh Jylla hynrei jia aïu ki nongïalam kim shym don ïa kata ka jingïohi jngai, kim shym don ïa kata ka ban ïohi ïa ki sawphew ne sanphew snem ban wan.
“Ka VPP ka don ha ka, ïa ka jingïohi jngai na ka bynta ka laiphew ne ki sawphew snem ban ïalam ïa u paidbah da ka lynti kaba khuid bad ka don ïa ka nongrim kaba skhem bad ka nongrim ka long ban wanrah ïa ka synshar ka khadar kaba khuid kaba suba kaba lait na ka bamsap bad kumjuh ruh ban ïeng ban ïada ïa ka hok longtrai ïa ka khyndew ka shyiap,” ong u Dr. Ricky.
Shuh shuh u la ong ruh ba u dei tang u nonghikai, hynrei u sngew ba ka dei kaba por kaba biang tam ïa u ban mih shakhmat. U la pynpaw ruh da kaba ong, “Ngam tip ka saiñ pyrthei kaba kumno ha ka por shuwa ba ngan mih baroh ki ïa ong ba ka saiñ pyrthei ka dei kaba jakhlia bad kum u nonghikai haba nga pyrkhat nga sngew kaba eh than hynrei haba nga phai pat sha kata ka saiñ pyrthei da ka nongrim Blei nga shem ba ka synshar ka khadar ka dei kaba saiñ dur hi da U Blei.”
Nalor kane u Dr. Ricky u la ong ruh ban mihkhmat na ka bynta ki 36 tylli ki konstitwensi kam long kaba suk hynrei da ka mynsiem kaba sngew skhem un ïeng ban ïasaid na ka bynta ka ri bad ka jaidbynriew bad khnang ba un lah ban leh kumta ka donkam ba ki paidbah jong ki 36 tylli ki konstitwensi kin ai ka jingkyrshan ïa u.
