Khliehriat, Rymphang 16
Wat hapdeng ka jingkhang tih bad shalan dewïong, ki karkhana thang dewïong lane kita ki ‘Coke Factory’ ki la nang kharoi ha kine ki khyndiat snem bad ka sorkar jylla ka la nang pynbha shuh shuh ïa ki kyndon kumno ban lah ban seng ïa kine ki karkhana.
Ka sorkar jylla ka pynshlur ïa ki riewshimet bad ki kompani ba kin wan shakhmat ban seng ïa ki karkhana thang dewïong wat la ki paidbah jong ki shnong kiba don ïa kine ki karkhana ki ju mih ban pyrshah namar ka jingshah ktah ka lyer bad ka jingshah pynjaboh ka umbam umdih.
Ka tnat kaba dei peit ïa ka bha ka miat jong ki paidbah da kaba ai jingïada na ka jingshah ktah ka lyer bad tyllong umbam bad kumta ter ter – ka Meghalaya State Pollution Control Board (MSPCB) – ka la kylla long ka tnat kaba ki nongshong shnong ki phai khmat ban dawa ïa ki lad jingïada na kiba kum kitei ki jait karkhana.
Haba ïakren bad u Member Secretary jong ka MSPCB, u Dr. GH. Chyrmang, MFS, ha ka Sngi Thohdieng, u la ong ba ym lah ban ong eiei halor ka jingkharoi jong ki karkhana thang dewïong namar ka sorkar hi ka la ailad ban buh ïa ki bad ki kyndon ban bei pisa na ka bynta ban seng karkhana hapoh ka jylla bad kino-kino kiba ïaid katkum ki aiñ, ka MSPCB kam don jingwit. Hynrei u la ong ba na ka bynta ki karkhana kiba ïaid be-aiñ, ka MSPCB ruh kam ai jingkyrshan satia.
Ha kane ka sngi, u Dr Chyrmang u la leit sha ka shnong Nongsning, East Jaiñtia Hills, ban jurip ïa ka jinglong jingman ki tyllong umbam umdih ba pyndonkam da ki artylli ki shnong – Nongsning bad Umrasong.
U la ong ba ka jingwan jurip jong u ka dei hadien ba u la ïoh pdiang ïa ka jingujor na ki Waheh Shnong ka Nongsning bad Umrasong ha kaba ïadei bad ka jinglong jingman jong ki tyllong um lyngba ka jingdon jong ki karkhana thang dewïong.
Haba kylli ïa ka jinglap na ka jingwan jurip, u Dr. Chyrmang u la ong ba ïa mynta ym pat lah ban ong eiei namar ka jingtohkit ka dang ïaid.
Ha kaba ïadei bad ka jingpyntrei ïa kawei ka karkhana thang dewïong, u la ong ba ka jingtrei kan hap ban sangeh shipor katba dang ïaid ka jingtohkit.
