Shillong, Rymphang:
Ka Federation of Khasi Jaiñtia and Garo People (FKJGP) Nartiang Unit, ka la dawa na ka Sorkar Jylla ba kan kyntiew kyrdan noh ïa ka PHC ha Nartiang kaba la don naduh u snem 1950 sha ka Sub District Hospital.
Ïa kane ka jingdawa, na ka liang ka FKJGP ka la buh hakhmat ka Myntri ka tnat ka koit ka khiah ka Kong Ampareen Lyngdoh, hadien ba ka la leit ban ïakynduh ha ka Lah Sngi U Blei ha shlem treikam ka jong ka.
Ka FKJGP Nartiang ka la pynpaw ba kumba ka long mynta, ka PHC ba don ha Nartiang kam lah shuh ban ai ka jingshakri kaba paka namar ka jingnang bun ki shnong bad ruh ki nongshong shnong. Kumta ka jingkyntiew sha ka Sub District Hospital kan lah ban ai ka jingshakri kaba kham bha ïa ki paidbah ka thaiñ.
Ha kane ka jingleit ïakynduh ïa ka Myntri, ïa ki nongïalam ka FKJGP Nartiang la synran lang da u Vice President ka FKJGP Sengkmie u Bah Kitboklang Nongphlang uba khmih ruh ïa ka FKJGP Jaiñtia Hills. Ha kane jingkynduh ïa ka Myntri ba la ïadon lang ruh u President ka FKJGP Nartiang Unit Bah Bin Raliang la ïoh ban aiti ïa ka dorkhas ha kaba la dawa ban kyntiew kyrdan noh ïa katei ka jaka ai jingsumar.
Haba kren sha ki lad pathai khubor hadien ba la dep ban ïakynduh ïa ka Myntri, u Bah Kitboklang Nongphlang u la ong, “Ka Nartiang PHC ka dei kaba la don naduh u snem 1950 ha ka por ba ka jylla ka dang hap hapoh ka jylla Assam bad ha u snem 1950 la tip ïa ka kum ka State Dispensary hynrei ha u snem 2001 la ithuh noh ïa ka kum ka PHC kaba don 10 jingthiah.”
Une u nongïalam ka FKJGP u la ong, kane ka PHC ka ai jingshakri ïa ki 36 tylli ki shnong bad ïa palat kumba 37295 ngut ki paid nongshong shnong bad mynta ka la long kaba donkam ban kyntiew kyrdan noh ïa kane ka jaka sumar khnang ba kan lah ban ai ka jingsumar kaba paka ïa ki paidbah.
U President ka FKJGP Nartiang u Bah Bin Raliang u la ong ba na ka liang jong ka Myntri ka la ai ïa ka jingkular ba kan shimkhia ïa ka jingdawa ka seng bad pyntip ba kan sa pynbeit ïa ka jingleit jurip ïa ka PHC ka ban donlang ka District Medical Health Officer bad ka FKJGP khnang ba kan ïoh leh ïa kaba donkam.
