Shillong Rymphang 16
Ka Dorbar Mang Tyngka jong ka Ïingdorbar Thawaiñ ba khatwei ka Jylla ka la sdang ha ka Sngi Thohdieng da ka jingkren u Lat ha Ïingdorbar.
Ha ka jingkren jong u Lat, u la kdew bun ki bynta kiba ka Sorkar Jylla ka la leh bad kiba dang leh na ka bynta ban kyntiew ïa ka Jylla naduh ka shongsuk shongshngaiñ, ki kam pynroi, bad kiwei kiwei ki mat kiba donkam ban ïakren bad pynbeit.
Napdeng kiba bun ki mat, ka Sorkar Jylla ka la ïai khot lyngba u Lat ïa ka Hynñiewtrep National Liberation Council (HNLC) sha ka jingïakren hapoh ki kyndon jong ka Riti Synshar ka ri bad jingpynbeit ka tnat Korbar Ri (Ministry of Home Affairs).
U Lat u la pynkynmaw biang ruh haba ïadei bad ka jingpynbeit pud bad ka Assam ha kaba ka kam ha ka wat banyngkong jong ka jingpynbeit pud ka la ïaid mynta ban pynbeit ïa ki jaka ha madan ban ïoh ïa u pud u sam, bad ka jingbteng ban ïakren hapdeng ki ar tylli ki Jylla ban lah ban pynbeit pud ha kiwei ki jaka ba dang sahteng.
U Lat u la kren ruh shaphang ka jingpynkhlaiñ ha ki bor pahara ka Jylla ha kaba yn pyndap ruh ïa ki kam ba lait kumba 3000 tylli hapoh ka tnat pulit.
U Lat u kren ruh shaphang ka jinglah ka Sorkar Jylla ban pyntreikam ïa ki kam pynroi kiba wan na ka Sorkar Pdeng nalor ka jingshimkhia ban kyntiew ïa ka kam jngohkai ha Jylla, ka jinghikai pyntbit ïa ki samla ban ïoh jingbit ha ki kam bapher bapher ha kaba yn hikai kumba 1.5 lak ngut ban kin tbit ha ki kam bapher bapher ha kine ki san snem lyngba ka Skills Meghalaya Program nalor ka jingshimkhia ban pynbha ïa ka koit ka khiah bad ki lad jingsumar.
U Lat u kren ruh katto-katne shaphang ki jaka sor kiba donkam ban pynwandur bha namar ki jaka ki la nang duna bad khapngiah katba nang ïaid ka por, ka jingkyntiew ïa ka kam jngohkai pyrthei bad ka jingbuhthong ban pynpoi ïa ka Meghalaya sha ka ïoh ka kot kaba long 10 billion US dollar ha u snem 2028 ka ban sa nang pynbha ïa ka GDP.
U Lat u la ban biang ïa kaei kaba ka Sorkar ka thmu ban pyntreikam ïa ka rukom tih dewïong katkum ka juk stad mynta.
