Shillong, Rymphang 16
U MLA ka Voice of the People Party (VPP) na Nongkrem, Bah Ardent M. Basaïawmoit u la ong ba wat la kam don jingeh ïa ka seng ban kyrshan ïa ki mat kiba la wanrah da kiwei-kiwei ki seng (ka liang pyrshah), hynrei kam long pat kaba donkam ban don ïa kawei ka rynsan ha ka liang pyrshah.
“Kane kam dei ka jingshisha, haba ngi kren shaphang ka jingïatylli ka liang pyrshah, kam mut ba ka jingïatylli kan wan tang hapoh kawei ka shatri,” la ong u Bah Basaïawmoit haba jubab halor ka jingbym ïatylli ki liang pyrshah hapoh ka Jylla.
U la ong ruh ba ka seng naduh kaba nyngkong ka la pynpaw ba kan ïatreilang bad baroh ki seng kiba don ha ka liang pyrshah halor ki mat kiba ktah ïa ka Jylla bad ki nongshong shnong jong ka.
Ha kajuh ka por, u la ong ba kum ka seng, kan ïatreilang badno-badno halor ki mat bad kam don jingeh ïa ka VPP ban ïateilang lane kyrshan ïa ki mat ba la pynsngew da kano-kano ka seng saiñ pyrthei ha ka liang pyrshah, watla kam sngew donkam ban don kawei ka rynsan ha ka liang pyrshah.
Haba kylli, u la ong, “Lada ngi kyrshan iwei-ïa-iwei hapoh ïing, ngi lah ban wan na ki seng bapher-bapher, shu buh lada ka Congress ka wanrah ïa ka mat kaba ktah ïa ki paidbah bad ka Jylla, ngin ym shong kli-kti, ngin ïasnohktilang bad kyrshan bad ïashim bynta lang ïa kata ka mat ba la wanrah da ka Congress, la ka dei ka TMC ruh, ngin ïasnohktilang.”
U Bah Basaïawmoit uba dei ruh u President ka VPP u la ong ba kane baroh ka shong halor kumno ka seng ka pynbeit ïa ka rukom treikam hapoh ïingdorbar bad ym da dei than eh ban don da ka kyrteng.
“Ka kyrteng tang na bynta ka jingïatylli kan ym treikam, ngi lah ba don kawei ka kyrteng hynrei lada ngim lah ban rah ïa ki mat kiba donkam hapoh ïingdorbar, kaei ka jingmut ban don kyrteng. Baroh ka dei ka jingshimkhia,” u la ong haba kren sha ki lad pathai khubor ha ka Sngi Thohdieng.
Shuh shuh haba kdew ba ki don 14 ngut ki MLA ha ka liang pyrshah, utei u nongïalam u la ong ba lada baroh ki nongmihkhmat ka liang pyrshah ki shimkhia da kaba ïashim bynta ha ki jingkylli hapoh ïingdorbar, ka Sorkar kan ym lah ban shu shim sting ïa ki kam ki jam.
