Shillong, Rymphang:
Ka jingshna ïa ka surok na Shillong sha Dawki ka la pynmih ar tylli ki surok bypass na Shillong sha Pynursla.
Kawei ka surok bypass ka dei hashwa ban poi ha Laitlyngkot kaba ïaid lait ïa ka shnong Laitlyngkot bad kawei pat ka dei ha Pynursla ha kaba ka surok kam ïaid lyngba ka surok kaba la don lypa ha Pynursla.
Ha Pynursla, na ka liang ki trai jaka ki la mynjur ban ai jaka ban shna ïa ka Pynursla bypass bad kane ka bypass kan jrong kumba 10 km haduh 13 km.
U Symbud Myntri Rangbah u Bah Prestone Tynsong u la ong ba ka Pynursla bypass ka dei kaba kham hadien ban pynwandur namarba kham mynshwa la thmu ban shna na ka surok kaba la don lypa kaba ïaid na Pynursla.
Hynrei mynta la dep ban jurip ïa ki jaka ban pynïaid ïa ka Pynursla bypass ha ryngkat ka jingdonlang ki ophisar kiba dei khmih bad mynta ym don jingeh shuh ban pynïaid ïa kane ka bypass.
