Shillong, Rymphang 16
U Lat ka Jylla, u Phagu Chauhan ha ka Sngi Thohdieng u la ai jingkren da ka Hindi ha ka sngi basdang ka Dorbar Mang Tyngka ka ba-ar jong ka Ïingdorbar Thawaiñ kaba khatwei ka Jylla, bad hashwa ba un ai jingkren u la pule ïa ki kyntien ai khublei ïa ki MLA, ba la thoh ha ka ktien Khasi bad Garo.
“Nga ai khublei ïa phi baroh kiba don ha kane ka por (my greetings to all of you who are here today)”, la ong u Lat kum ka jingai khublei ïa ki dkhot ka Ïingdorbar, hashwa ba un pule ïa ka jingkren jong u (Governor’s Address) da ka ktien Hindi.
U Lat u la pynbud ruh da ka ktien Garo ban ai khublei ïa ki dkhot ka Ïingdorbar da kaba ong, “Pilaknan namgipa salamko on·chengna.”
Kane ka rukom kynnoh u Lat ïa kine ki kyntien Khasi bad Garo wat la kam da shai bha, hynrei kane lehse ka dei ka sien banyngkong ba u Lat un sdang ïa ka jingkren khublei da kaba pyndonkam ïa ka ktien Khasi bad Garo ha Ïingdorbar.
U Lat u la sdang ïa ka jingkren jong u tang mar ïa dep ka jingrwai ieid ri ka ri India Jana Gana Mana…. ha kaba u la sdang ha ka por 10.10 baje mynstep, bad namar ba u sngew shitom ha ka met, u Lat u la shu kren lyngkot bad pynkut noh ïa ka jingkren tang hapoh 10 minit kata hapoh ka por 10.20 baje mynstep.
Ka jingkren jong u Lat katkum ba la dep pynkylla lypa sha ka ktien Phareng ka don haduh 17 sla.
Ha kane ka jingkren jong u Lat ha Ïingdorbar, la maitphang ïa ki mat bapher bapher kiba ka Sorkar Jylla ka don ban ïathuh sha ki nongshong shnong ka Jylla lyngba u Lat.
U Lamphang ka Ïingdorbar Thawaiñ ka Jylla, u Thomas A Sangma u la ong ba u Lat um don ha ka met bakoit bakhiah bad u hap ban pynlyngkot ïa ka jingkren jong u, bad kumba la ïohpdiang ruh ïa ka jingkyrpad, la shim beit ba baroh ki jingkren kiba la don ha ka jingthoh ki long kumba u Lat u la kren lut wat haba u khlem lah ban ai jingkren lut naduh sdang haduh kut.
U Thomas u la ïathuh ba ïa kaei kaba u Lat u kren ha Ïingdorbar la lah ruh ban pynkylla noh hangto-hangto sha ka ktien Phareng na ka bynta ban ïohsngew ki MLA.
Hynrei u la ong ba namarba ka dei ka jingsdang ki dang don ki jingbymbiang ha kaba ki kyntien kiba kren ha ka Hindi lehse kin nym kylla beit thik sha ka Phareng.
“Kane ka dei ka jingsdang ha kaba la lah ban leh ïa kane lyngba ka jingpyndonkam ïa ki kor ki bor kynthup ruh ïa ka artificial intelligence,” la ong u Lamphang.
Haba kylli la kane ka dei ka jingbud nuksa na kaei kaba leh ha Parliament, u Thomas u la ong, “hooid kane ka dei shibynta kaba ngi bud nuksa ïa kaei kaba la leh ha Parliament, tangba kaba kham hakhmat ka dei ka jingthrang jong ngi hi kaba ngi sngew dei ban leh kum ka Ïingdorbar Thawaiñ ka Jylla.”
