Shillong, Rymphang 16
U nongïalam ka Trinamool Congress (TMC), Dr. Mukul Sangma ha ka Sngi Thohdieng u la ong ba ka jingrung jong u sha ka saiñ pyrthei ka long ban pynleit jingmut ha ka saiñ pyrthei jong ka Jylla bad un ïai bteng ban leh ïa kata.
“Ngam kwah ban pynduna ïa ka jingkheiñ kaba 60 ha ka ïing jong ki 60 ngut haba phai sha ka ïingdorbar thawaiñ ka Jylla. Ka jingpynleit jingmut jong nga barabor ka long ha ka saiñ pyrthei ka Jylla,” la ong u Dr. Sangma haba jubab la un ïa aireng ne em ha kane ka ilekshon ban wan sha ka Lok Sabha.
Haba pynsngew ba ka Meghalaya ka long ka Jylla kaba rit, u la ong ba ki mat kiba tynjuh ïa ki paidbah bad ïa ka Jylla kumjuh ki donkam ïa ka jingïatreilang jong baroh kiba don ka jingsngewkhia.
“Nga la sdang ha ka kam saiñ pyrthei ha u 1993 da ka jingthmu ban pynleit jingmut ha ka saiñ pyrthei ka Jylla bad ngan ïai bteng ïa kane,” la ong u Dr. Sangma haba kren sha ki lad pathai khubor.
Halor ka jingpynkhreh ka seng na bynta ka ilekshon MP ban wan, u la ïathuh ba ka la don ka jingïakren hapoh ka kynhun synrop jong ka INDIA, hynrei hadien ki jinglong-jingman, kiba bun na ki seng hapoh ka kynhun synrop jong ka INDIA ki la rai ban ïaid marwei bad ban pynïeng ruh ïa la ki jong ki kyrtong.
Haba phai sha Meghalaya, utei u Myntri Rangbah barim ka Jylla u la ong, “Ngi la ïai ap bad ki jingkdew dak ki long ba ki jingïakren ki dang ïaid, hynrei ka i kumba kam lah ban urlong. Kumta, ngi don 2 tylli ki konstitwensi bad ka rai ka long la yn ïakhun ne em ha baroh ar. Na ka liang jong ngi, ngi la pynneh barabor ba to ngin ïakhun ïa kawei, katba ïa kawei, yn ïakhun da kiwei pat ki seng. Ai ba kan don ka jingpyrshang haba ïadei bad kane ka bynta namar ngi don ïa kajuh ka thong ban ïakhun pyrshah ïa ka bor Sorkar ba mynta.”
Haba kdew ba ka seng kan sa pynbeit noh ïa kane ka kam ha kine ki khyndiat sngi ban wan, u la ong, “La kumno-kumno, ha ka Lah Sngi U Blei, ngin sa pynbna noh ïa u kyrtong na bynta ka Tura. Ngi dang ïakren na bynta ka Shillong, tangba haba phai sha ka Tura, ngi la jan poi sha ka jingïabeit.”
Shuh shuh haba kylli kumno ka seng kan pyntikna ba ka TMC ka poi sha ka thong ha kane ka ilekshon ban wan, u la bynrap, “Dei na kata ka daw ba baroh ki seng saiñ pyrthei ki pyrshang ban ïawan lang, ka la don ka jingsngewthuh bad namarba baroh ki seng saiñ pyrthei ki mynjur ban ïawan lang…ka long da kumwei pat ba kam shym la poi sha ka jingseisoh. Hynrei ki jingpyrshang ki la don bad haba ki jingpyrshang ki la don, ka mut ba ka la don ka jingsngewthuh bad kumta kane dei ka jingshisha.”
