Shillong, Rymphang 16
U MLA ka Nongkrem uba dei ruh u President ka Voice of the People Party (VPP), Bah Ardent Basaïawmoit, u la pynpaw ka jingsngewtynnad haba u Lat ka jylla u la pyrshang ban kren Khasi haba ai jingkren ha ka sngi sdang jong ka ïingdorbar thaw aiñ ka jylla, hynrei u kwah ba u Lat un kren beit da ka phareng haba wanrah ïa ka mang tyngka ban sngewthuh lang baroh.
U Bah Ardent u la ong ba ka seng kam kwah ban kren Hindi ha ïingdorbar thaw aiñ hynrei ym lah pat ban pynbor haba um nang ban kren phareng. Kumta ki la ai jingmut ba lada um nang dei ban shu pynkylla noh sha ka ktien phareng.
U la pynpaw ba um sngewhun namar la pynkylla phareng tang ïa ki MLA katba ki paidbah kiba sngap kim sngewthuh namar u kren Hindi.
U la ïathuh ba ki paidbah mynta ki la sdang sngewtynnad ban sngap ïa ka jingïatai ki MLA ha ïingdorbar hynrei lada u Lat ka jylla u kren da ka Hindi ki briew kiba sngap nabar kim sngewthuh.
Kumta u la kyntu ïa ka sorkar ba dei ban ïakren bad Sorkar India ban phah da u Lat ba nang ban kren phareng namar ha Meghalaya ki don ar jaidbynriew kata kiba nang ban kren Khasi bad Garo.
Nalor nangta, u Bah Ardent u la pynpaw ba lada ma u ruh u leit sha kiwei ki jaka lada u lah ban kren ïa ka ktien jong ki ka pynjan bad sngewieid ïa kito ki trai jaka.
Halor ka jingmih jong uwei u ophisar ba la shah weng na ka Lokayukta, u Bah Ardent u la ong ba kane ka la pynskhem ïa ka jingïakhih ka VPP, hynrei ïa kane ka kam ki MLA ka VPP kin sa ïakren bha ha ïingdorbar thawaiñ.
Namar kata, u la ong ba ka seng VPP kam dei ka seng lehnoh, hynrei ka dei ka seng saiñpyrthei. Kumta haba ka sorkar ka kwah ban ïakren ki kloi ban ïakren ban ïatai na bynta ka jingmyntoi jong ki paidbah.
