Shillong, Rymphang 18
U nongïalam ka Trinamool Congress (TMC), Dr. Mukul Sangma u la ong ba un ai lad shuwa ïa ka Sorkar MDA 2.0 ba kan dap shisnem kum ka Sorkar ha shuwa ba un kren eiei halor ka rukom treikam jong ka.
“Ai lad kin pyndep shuwa shisnem, hadien kata ngan sa kren. Nga la rai ba la kumno-kumno ban ailad ïa ki shi snem ban pyni ïa ka jingshimkhia ha ka ban khmih ïa ki mat kiba ktah ïa ki nongshong shnong, ban don ka jingkitkhlieh ha ka ban ïada ïa ka bha ka miat ki paidbah bad ka bha ka miat jong ka Jylla,” la ong u Dr. Sang-ma haba jubab ïa ka jingkylli halor ka jingïohi jong u ïa ka rukom trei-kam ka Sorkar MDA 2.0 ka ban sa dap shi snem ha u bnai Lber ban wan.
U la ong ruh, “Ngi long kiba peitngor ïa man la kawei-pa-kawei ka rai jong ka Sorkar. Ngin khmih bniah bad na kine, ngin sa tynjuh ïa ka Sorkar, ngin shim ka jingkitkhlieh bad pyndep la ka jong ka kamram kum ka liang pyrshah bad kane ka dei kaei kaba ngin leh.”
Ïa ka Sorkar MDA 2.0 la lamkhmat da ka National People’s Party (NPP) kaba don 8 ngut ki Myntri hapoh ka Kynhun Myntri kaba 12 ngut.
Ki 4 ngut kiwei pat ki kynthup ïa 2 ngut na ka United Democratic Party (UDP), uwei na ka Bharatiya Janata Party (BJP) bad uwei na ka Hill State People’s Democratic Party (HSPDP).
Ha kajuh ka por, na kitei ki 12 ngut, 4 ngut ba kynthup ïa u Myntri Rangbah ka Jylla, u Conrad K. Sangma ki dei na Ri-lum Garo katba 8 ngut kiwei pat ki dei na Ri-lum Khasi-Jaiñtia.
Nalor u Sangma, ka thup ka Kynhun Myntri ka kynthup ïa 2 ngut ki Symbud Myntri Rangbah – Bah Prestone Tynsong bad Bah Sniawbhalang Dhar, Dr. M. Ampareen Lyngdoh, Bah Comingone Ymbon, Marcuise Marak, Abu Taher Mondal bad Rakkam A. Sangma (baroh na ka NPP).
Ha kawei ka liang, ki Myntri ka UDP ki kynthup ïa u MLA ka West-Shillong, Bah Paul Lyngdoh bad MLA ka Khliehriat, Bah Kyrmen Shylla.
Shuh shuh u MLA ka BJP, Bah A.L. Hek bad MLA ka HSPDP, Bah Shakliar Warjri ki long sa 2 ngut kiwei pat ki Myntri hapoh ka Sorkar MDA 2.0.
