New Delhi, Rymphang 18 (UNI)
Haba pynbna ba ka BJP kan hap ban jop palat 370 ngut ki MP khnang ba ka kynhun National Democratic Alliance (NDA) kan ïoh 400 ngut ki MP ha ka ilekshon Lok Sabha, u Myntri Rangbahduh, u Narendra Modi, ha ka Sngi U Blei u la kyntu ïa ki nongtrei ka BJP ba kin leit sha man la uwei-pa-uwei u nongthep ‘vote’ hapoh ki 100 sngi ban wan khnang ban pynthikna ba ka seng kan ïoh synshar biang ha ka sien kaba lai.
“Hapoh ki 100 sngi ki ban wan, ka thong jong ngi ka long ban pynïatylli bad ban ïakynduh ïa baroh ki nongthep ‘vote’. Ka long kaba donkam ban ïoh ïa ka jingshaniah jong ki paidbah, bad da ka jingïatreilang, ka BJP kan ïoh ïa ka lad ban shakri ïa ka Ri da ka jingjop badonburom,” la ong u Modi haba kren sha ki nongïashim bynta ha ka National Convention jong ka BJP.
Haba pynpaw ïa ki jingjop jong ka sorkar ha ki 10 snem ba la leit, u Modi u la ong ba ki san snem ban wan kin long ki bakongsan ban pynurlong ïa ka jingphohsniew ban ïohi ïa ka India kum ka Ri kaba la kiew shaphrang ha baroh ki liang.
“Ban poi sha ki thong, ka sienjam banyngkong ka long ka jingwanphai jong ka BJP sha ka bor da ka jingjop badonburom… Ban pynurlong ïa kane, ka BJP ka dei ban jop palat 370 ngut ki MP ha ka ilekshon MP Lok Sabha ka ban wan,” u la ong.
U Modi u la ong ba ka jingkwah jong u ïa ka jingjop badonburom kam dei ban ïoh jingmyntoi saiñpyrthei, hynrei ban rah ïa ka Ri India shakhmat. U la pynpaw ba ka sorkar ka la pyndep ïa kiba bun tylli ki kam kiba la sahteng da ki phew snem.
“Ngi la pyni ïa ka jingshlur ban pyndep ïa kiba bun tylli ki kam kiba la sahteng da ki phew snem. Da ka jingshna ïa ka Ram Temple ha Ayodhya, ngi la pynkut noh ïa ka jingap kaba la neh da ki spah snem. Hadien 70 snem, ngi la plie ïa ka Kartarpur Sahib Corridor. Hadien 70 snem, ka Ri ka la weng noh ïa ka Article 370,” la ong u Modi.
Nalorkata, u Modi u la kynthah ïa ki seng kiba don ha ka liang pyrshah bad u la ong ba kine ki seng kim nang ban pynurlong ïa ki jingkular ki jong ki, hynrei kim salia ban kular thok sha ki paidbah.
“Kim nud satia ban pynurlong wat tang kawei ka jingkular: yn ym don ka seng na ka liang pyrshah ka ban kular ïa ka ‘Viksit Bharat’. Ha kajuh ka por, kim buh jingkylli ïa ngi. Kine ki seng ki la kubur ba kim lah ban ïalam ïa ka India sha ka lynti jong ka roi ka kiew,” u la bynrap.
